Марказобод — «Футболимиз келажаги» турнири ғолиби

Маҳалла ёшларининг бўш вақтини мазмунли ташкил этиш, улар ўртасида футболни янада оммалаштириш, иқтидорли ёшларни қўллаб-қувватлаш мақсадида уюштирилган мусобақа уч ёш тоифасида – 9-10, 11-12 ва 13-14 ёшли болалардан иборат жамоалар ўртасида ўтказилди. Унда мамлакатимизнинг барча ҳудудларидан футбол жамоалари ғолиблик учун майдонга тушди.

9-10 ёшли болалар ўртасида Боғдод туманидаги Самарқанд маҳалласи жамоаси биринчи, Бухоро шаҳридаги Ашфор маҳалласи жамоаси иккинчи, Жомбой тумани Алишер Навоий номидаги маҳалла жамоаси учинчи ўринни эгаллади.

11-12 ёшлилар ўртасидаги баҳсларда Тўрткўл туманидаги Марказобод маҳалласи жамоаси бош совринни қўлга киритди. Пастдарғом туманидаги Синчи маҳалласи жамоасига иккинчи, Жиззах туманидаги Зиёкор маҳалласи жамоасига учинчи ўрин насиб этди.

13-14 ёшли футболчилар ўртасидаги учрашувларда Сариосиё туманидаги Гулобод маҳалласи, Жиззах туманидаги Қатортол маҳалласи ва Наманган шаҳридаги Умид маµалласи жамоалари ғолибликни қўлга киритди.

— Маҳалламизда уч мингга яқин аҳоли яшайди, — дейди Тўрткўл туманидаги Марказобод маҳалласи фаолларидан бири Улуғбек Ҳусайний. — Уларнинг асосий қисмини ёшлар ташкил этади.  Маҳалламизда ёшларга спорт билан шуғулланиш учун барча зарур шароит яратилган. Бу эса уларнинг бўш вақтларини мазмунли ўтказишларида жуда қўл келаётир. Тўрт йилдирки, маҳалламиз ёш футболчилари мазкур турнирнинг финал босқичида мунтазам иштирок этиб келмоқда. Ёш футболчиларимиз бу йилги турнирда бош совринни қўлга киритиб, маҳалламиз номини бутун мамлакатимизга танитганидан жуда хурсандмиз. Бу ютуқ келажакда маҳалламиз фарзандларининг жисмоний тарбия ва спортга бґлган қизиқишларини янада ошириши шубҳасиз.

Суратда: турнир ғолиби — «Марказобод» маҳалласи ёш футболчилари.