Марказий Осиёда қитъа кубокларига бу йилги қизиқиш

Булар ўз лигаларининг амалдаги чемпионлари: “Бунёдкор”, “Олой” Ўш ва “Равшан” Кулоб. Бу уч клуб бугунгача жами 6та ўйинга мезбонлик қилди. Минтақамиздаги яна бир ўйин 2-саралаш раундида бўлиб ўтганди. Ўшанда Чемпионлар лигаси баҳсида “Локомотив” “Ал-Қувайт”ни қабул қилганди.

Биз ушбу клубларнинг уй учрашувларига қитъа кубоклари доирасида қанчадан томошабин тушаётганига қизиқдик. Натижада, биз қуйидаги рақамларга дуч келдик.

2 февраль. Саралаш раунди. “Равшан” Кулоб – “Ал-Ярмук” Яман 2:1. Турсунзода шаҳри “Металлург” стадиони. 5000 томошабин

9 февраль. 2-саралаш раунди. “Локомотив” Тошкент – “Ал-Қувайт” 1:3. “Пахтакор” марказий стадиони. 5000 томошабин

26 февраль. 1-тур. “Олой” Ўш – “Риффа” Баҳрайн 0:0. Ўш шаҳри “Суюмбоев” стадиони. 10275 томошабин

11 март. 2-тур. “Бунёдкор” Тошкент – “Ал-Жаиш” Қатар 1:2. “Пахтакор” марказий стадиони. 3600 томошабин

12 март. 2-тур. “Равшан” Кулоб – “Сафа” Ливан 1:2. Турсунзода шаҳри “Металлург” стадиони. 7000 томошабин

18 март. 3-тур. “Равшан” Кулоб – “Тат Рас” Иордания 2:3. Турсунзода шаҳри “Металлург” стадиони. 4000 томошабин

19 март. 3-тур. “Бунёдкор” Тошкент – “Фулад” Эрон 1:1. “Пахтакор” марказий стадиони. 1950 томошабин

Ҳозирча минтақамизда энг кўп ишқибоз кирган ўйин “Олой” – “Риффа” беллашуви бўлиб турибди. Ўзбекистонлик комиссар Олим Арифов бошчилигида ўтган бу учрашувга 10275 нафар мухлис тушган. Энг кам ишқибоз эса “Бунёдкор”нинг “Фулад” билан ўйинига келган – атиги 1950 нафар.

ОФК кубогининг “Равшан” – “Сафа” баҳсига 7000 мухлис ташриф буюрганди. Эътиборга молик факт: ОФК кубоги-2014да бугунгача жами (саралаш босқичи билан) 51та учрашув ўтказилган бўлса, “Олой” ва “Равшан”ларнинг томошабинлар бўйича кўрсаткичлари ҳозирда 2- ва 5-ўринларда. “Персипура Жаяпура” (Индонезия) жамоасининг уй учрашувларига 1-турда 9000 ва 3-турда 9866, “Арема Кронус” (Индонезия) клубининг 2-тур ўйинига 29130 нафар мухлис тушган. ОФК кубогининг қолган ҳеч бир ўйинига ҳали 7 мингдан ортиқ ишқибоз кирмади.