МАҒЛУБИЯТ ФАЛСАФАСИ

Буларнинг барча-барчасига мураббий айбдор! Саралаш босқичида нечта ўйин бўлган бўлса, бари бир хилда, ҳеч қанақа ўзгариш йўқ, ўйиндан-ўйинга очилиб бориш йўқ. Аксинча, турдан-турга ўйинимизнинг сифати тушиб борди.

"СЕРВИС"

Иккинчи ва учинчи босқичнинг дастлабки ўйинларида чартер рейслардан фойдаланган терма жамоамиз, ҳал қилувчи палла келганида оқсоқланди. Ўзбекистон миллий терма жамоаси Тошкент вақти билан 28 август куни соат 19:00да меҳмонхонадан чиқиб кетдилар ва 29 август куни соат 12:00ларда Вухан шаҳридаги меҳмонхонага бориб жойлашдилар. Муҳим ўйин олдидан сарф этилган 17 соатни сифатли хизмат кўрсатиш орқали камайтириш ҳам мумкин эди. Жанубий Корея терма жамоаси ўйинга бир неча кун қолганида Тошкентдаги вазият билан танишиб кетган бир паллада, Ўзбекистон миллий терма жамоасининг асосий таркиб ўйинчиси муҳим паллада захарланиб ўтирса. Қани профессионаллик? Нега бошқалар каби МТЖда ўзининг ошпази йўқ? Бизда ошпаз ва "диетолог"ни ишини ҳам бир киши, жамоага тез тиббий ёрдамни кўрсатиши мумкин бўлган шифокор бажаради. Мана Сизга натижаси. Бу ўйин олди йўл қўйилган ва якунда бизнинг зараримизга ишлаган хатолардан иккитаси.

НЕСТЕРОВГА САВОЛЛАР БОРМИ?

Сўнгги тўртта ўйинда мағлубиятга учрадик, шулардан ҳеч йўғи биттасида, ҳа БИТТАСИДА Игнатий Нестеров дарвозада турганида биз бугун ЖЧга чиқаётган бўлар эдик. Қаранг, биз ўзимиздан тепадан турган жамоаларга мағлубиятга учраганмиз, Жанубий Корея, Эрон ва Сурия, айнан шу терма жамоалардан олинадиган очколар бизни ҳозир ҳеч бўлмаса учинчи ўринда қайд этилиб турилишимизга сабаб бўлган бўларди. Ким кучли, Суюновми ёки Лобанов деган саволларга мен доимий равишда Нестеров деб келганман, бугун Нестеров яна бир бор сўзимни исботлади.

СЕРГЕЕВГАЧИ?

Унга саволлар кўп! Унга эмас, Самвел Бабаянга саволлар кўп. "Тўп учун охиригача курашади, ҳимояга қайта оладиган ҳужумчи у", деб майдонга тушираверадиган Сергеев бор ўйинда терма жамоа гол урмаяпти ва голлар ўтказаяпти. Ўз-ўзидан уни на ҳимояда, на ҳужумда фойдаси тегмаётганлигидан дарак бу! Одил Аҳмедовнинг бугунги гаплари ҳам айнан унга тегишли эканлигини бутун дунё ТВ орқали эшитди! Агар терма жамоамиз ЖЧга чиқишини истасанг, 32 миллион хақл сендан илтимос қилади, илтимос ЎЙИНГА ТУШМА! 

ЖАВОБИНИ ОДИЛ АҲМЕДОВ БЕРДИ!

МТЖ сардорининг алам билан берган интервюсини томоша қилдингиз. Яна нима дейиш мумкин? Бу футболчилар ЖЧга чиқишни исташмаяпти деганларга жавоб. Денисов, Нестеров, Жепаров ва Аҳмедов бу сўнгги имконият эканлигини билиб турибди. Аслида Эрон билан ўйиндан кейин Аҳмедов МТЖдаги фаолиятини тугатишни истаганди, лекин ўзида куч топганди. Агар Жанубий Кореяни ютворсак, билингки унда фақат 5-6 кишининг ҳиссаси бўлади! Агар мабодо гол уриб қўйиб, ишни қойил қилгандек ОАВга нафрат кўзи билан қарайдиган бўлсангиз... Биз билиб бўлдик, ким, аслида ким! 

НОЎРИН ЎЗГАРТИРИШЛАР

Мирзаев ва Ҳайдаровни ўйинга қўйиш, умуман нотўғри эди. Ҳайдаровни ўйинни бошидан қўйиш керак эди ёки умуман туширмаслик. Ҳужум қилиши керак бўлган терма жамоа нега таянч ярим ҳимоячисини туширганини Самвел Бабаяндан бошқа ҳеч ким тушунтириб бера олмаса керак. Сардор Мирзаев бундай катта ўйинларда ўйнамаган бўлса, ОЧЛ билан ҳал қилувчи палладаги МТЖнинг ўйини бошқа-бошқа нарса эканлигини ҳамма билади. Абрамовни битта устун томони бор эди, таркибда қилган хатосини 5-дақиқадаёқ тузатишдан қўрқмасди. Қосимовнинг устун томони эса футболчиларни жой-жойига тўғри қўйишида. Бу "Sony Playstation" эмас-ки, истаган пайтда уни ёқиб ўйинчиларни жой-жойига қўйиб ўйнатадиган. Бу МТЖ, унда тайёр ўйинчилар, ўйин амалиётига эга футболчилар ҳаракат қилиши керак. Тўхтахўжаевни марказга қўйиб, Шораҳмедовни қанотга, ўз жойига қўй! 

Бу мураббий

ҲАМДАМОВ, МУСАЕВ, ГАЛИУЛИН ҳам ЎЗБЕКИСТОН ФУҚАРОСИ!

Иссиқ жонмиз, мана Сардор билан нима бўлди? Унинг ўрнини босиши мумкин бўлган футболчи бу Достон Ҳамдамов эди. Ўша Ҳамдамовни Сергеевдан кам жойи йўқ, бу мавсум Сергеев 6та, Ҳамдамов 10та гол урди. Паспортида ЎЗБЕКИСТОН деган ёзуви бор, худди шундай Галиулинда ҳам. Шомуродовдан кўра анча эрта кетган Россияга ва захирадан қачон майдонда тушишини кутмайди. Бу билан Шомуродовни ёмонламаяпмиз. Шомуродов бугун ёмонлар ичида, энг яхшиларидан бири бўлди. Мусаевни нимаси кам? Бугун айнан у майдонга тушиши керак эди. Асосий таркибда Азиз Ҳайдаров ўйнамагач, Аҳмедов ҳам бекорга олдинга қараб чопиб кета олмасди. Чунки унинг ортида ишонадигани йўқ эди. Наҳот шуни Бабаян билмаса? Тўғри, бу энг кучли терма жамоа, кучсиз мураббий қўл остидагиси фақат! Бошқа мураббий қўл остида биз аллақачон ЖЧ йўлланмасини қўлга киритиб бўлган бўлар эдик.

ҲАКАМ

Ўз майдонингда деворлар ҳам ёрдам беради. Бизни қийшиқ зарбаларимизга ҳакам айбдор эмас!

ЯНГИ МУРАББИЙ КЕРАК

Бугун болалар футболи, ПФЛ ёки бошқа нарсалар ҳақида ёзмаймиз. Кўп ёздик. Абрамов ва Қосимовни биргина ўйинга тандем сифатида таклиф қилайлик, бундан баттари бўлмайди, кўрасиз, биз Кореяни ютамиз.

ЧИПТАНИ ЎЗ НАРХИДА "СОТИШ"!

Мана энди бизга мухлис керак, юрагида ўти бор мухлис керак. Лекин чипталар "касса"ларда "беркиниб" ётган бўлса, Жанубий Корея билан ўйинда мухлисларнинг ўт бўлиб ёнишини кутманг! Чиқар чиптани, сот ўз эгасига, ўз нархида, виждонан киришинг ишингизга, биз жуда яхши биламиз чипталарни ким "босиб" ётганини! 

Чипта ўз нархида сотилмаса, бундай ҳолатни ўйинда кўрмаймиз!

ЭРТАГА БАЙРАМ, ДУО ҚИЛИНГ!

Эртага юртимиз бўйлаб Қурбон ҳайити кенг нишонланади. Эртага ҳайит номозлари ўқилади! Аҳмедовнинг гапи барчамизнинг эт-этимизни жимирлатди тўғрими? Келинг шу йигитларимиз учун дуо қилайлик, сўрайликки Жанубий Кореяни мағлубиятга учратайлик. Ўқувчилардан илтимосимиз, сўкинманг! Сизлар учун ўйнаганлар ҳаққи-ҳурмати, уларни ҳақорат қилманг!

Championat.asia журналистлари!