"Ливерпуль" Салоҳнинг "Интер" билан ўйин таркибидан четлатилишини жазо деб баҳоламаяпти, бошқа интизомий чоралар ҳам кўрилмайди

"Ливерпуль"дагилар Муҳаммад Салоҳнинг жамоанинг яқин ўйиндаги таркибидан чиқарилиши унинг айтган сўзлари учун жазо эканлигини инкор этишмоқда.

Мисрлик вингер Чемпионлар лигаси умумий босқичининг 6-тури доирасидаги "Интер"га қарши ўйин учун инглиз жамоаси қайдномасига киритилмади. Аввалроқ Салоҳ кетма-кет учта ўйинда асосий таркибга тушмаганидан сўнг клубнинг ўзига бўлган муносабатини танқид қилган эди: "Менга алам қиляпти. Мен АПЛ ғолиби бўлдим, ушбу авлод ичида ҳаммадан кўп гол уряпман. Нима учун ҳаммаси бундай якун топиши керак?".

"The Athletic" хабарига кўра, "қизиллар" футболчининг миланликлар билан ўйин таркибидан чиқарилишини интизомий чора сифатида баҳоламаяпти. Ушбу вазият Муҳаммаднинг кейинги ўйинлар қайдномасига киришига таъсир қилмайди деб ҳисобланмоқда.

"Ливерпуль"даги манбаларнинг таъкидлашича, футболчига нисбатан келгусида бошқа интизомий чоралар қўлланилмайди. Улар қисқа танаффусдан футболчи ҳам, клуб ҳам ютади деб ишонишмоқда.

Бундан ташқари, мерсисайдликлар ҳали ҳам футболчи билан 2027 йилгача мўлжалланган шартномага содиқ ва юзага келган вазиятни ҳали ҳам ўнглаш мумкин деб ҳисоблашади.