Легионерлар лимити 4+1га ўзгарди. Бу керакмиди?
22 янв 2018 12:13
Новости

Легионерлар лимити 4+1га ўзгарди. Бу керакмиди?

Бу йил ички чемпионатимизда катта ўзгаришлар бўлиши кутилмоқда. Аввало олий лига Суперлига, биринчи лига эса Про-лига номига ўзгарди.

ПФЛ Суперлигада 12та жамоа иштирок этишини маълум қилгани билан ҳалиям барча жамоаларни тўлиқ билмаймиз. Чунки мусобақа ўтказувчи ташкилот фалон-фалон жамоа расман Суперлигада ўйнайди деб якуний қарор қилгани йўқ. Балки ПФЛ ўзи учун аниқлаб олгандир, лекин оммага эълон қилмагунча барибир тахмин ва фаразлар кўпаяверади.

Шунга қарамай, ПФЛ 2018 йилги мусобақалар учун Регламентни ишлаб чиқди. Регламентда янгилик кўп ва бу ҳақда чемпионат бошланишига яқин қолганда батафсил тўхталамиз. Эшитимизча, бу йил Суперлига март ойининг бошидан бошланар экан. Шу ўринда Регламентдаги легионерлар лимити бўйича янгиликка тўхталишни лозим топдик. Негаки шу пайтгача 3+1 бўлиб келган лимит бу йилдан 4+1га ўзгарди. Яъни, бу йил клублар ўз сафларига жами бешта хорижлик футболчини қўшиб олишлари мумкин. Ва мана шу беш нафар легионер орасида биттаси осиёлик бўлиши шарт.

Энди ПФЛ нима сабабдан бундай қарорга келди, аксар клублар шундоқ ҳам пул томонлама қийналаётган бир пайтда шартмиди шу иш дейишингиз мумкин. Аммо унутмангки, Суперлига клублари легионер олиб келишга мажбур эмас. Хоҳласа битта ё иккита олиши, хоҳламаса умуман олмаслиги мумкин. Энди буёғи клубларнинг ўзига қолган. Лекин бизга маълум бўлишича, бу ўзгариш “Пахтакор” таклифи билан юз берган. Яъни, “Пахтакор” бош мураббийи Шота Арвеладзе легионерлар лимитини ошириш бўйича таклиф берган, натижада ПФЛ хорижликлар сонини биттага ошириб қўйган.

Ўзбекистон чемпионатига легионерлар керакми? Албатта, яхши ўйинчи бўлса ҳаммага керак. Лекин шунчаки келиб бир йил ё ярим мавсумни ўтказадиган футболчидан нима фойда? Яхши легионер бу - яхши пул дегани. Уларнинг бир йиллик маошини бизда унча-мунча клуб тўлай олмайди. Шу боис кўпчилик арзон-гаров легионерларга ёпишиб олди. Кўпларининг эса номи легионер холос, ўйини борасида мақтаниб гапира олмаймиз. Лимитнинг 4+1га ўзгариши ўзбек футболига нима беради деган саволга тўхталишдан олдин охирги уч йил ичида юртимизда ўйнаган легионерлар ҳақида фикр юритсак. Зеро бирор ўзгаришга қўл уришдан олдин бунинг сабабларини ўрганиб чиққан маъқул деб ўйлаймиз.

2015 йил. 39 легионер

Статистикага мурожаат қиламиз, 2015 йилги чемпионатда 39 нафар легионер Ўзбекистон олий лигасида ўйнаган. Лекин уларнинг барчаси ўзидан яхши таассурот қолдирган дея олмаймиз. Мана шу 39 хорижликдан 13 нафари чемпионат охиригача клубларда қолмаган. Хусусан “Насаф”да ўйнаган Олександр Коблаш дастлабки учта турдан сўнг нимадир сабаб бўлиб уйига кетиб қолади.

“Бухоро” йил бошида учта легионер билан шартнома имзолайди: Богдан Хауши, Виталий Пламадела ва Вадим Кравческу. Аммо улар биринчи даврадан кейин клубни тарк этишади. Вячеслав Шевченко деган ҳужумчи эса бир давра “Қизилқум” шарафини ҳимоя қилиб, атиги иккита гол уришга эришади.

Биринчи даврадан кейин жамоа билан хайрлашиш “Навбаҳор”да ҳам рўй беради. Юрий Рижко билан Александр Меленчук юртимизни тарк этишади. ОЧЛ учун олиб келинган Дамир Кояшевич билан Руслан Корян “Локомотив” гуруҳдан чиқа олмагач, ёзда клуб билан хайрлашишади. “Динамо” эса ҳеч ким танимайдиган икки легионер Константин Мандриченко ва Александр Болиян билан биринчи даврани бир амаллаб ўтказади, аммо ёзда уларга жавоб бериб юборади.

Ҳартугул “Машъал”нинг россиялик ҳужумчиси Владислав Иванов 12 ўйинда бешта гол уриб ўзидан яхши таассурот қолдираётганди, бироқ у ҳам биринчи даврадан кейин кетиб қолади. “Қўқон-1912” таркибида ўнта учрашувда майдонга тушган Владимир Аргун кўпчилик қатори ёзги танаффусда уйига қайтиб кетади.

Яна қизиқ томони шундаки, икки футболчи ёз пайтида ўтказилган тиббий кўрикдан ўта олмаган. Лекин улар мавсум охиригача клуб таркибида қолишади. Булар - “Андижон” футболчиси Предраг Вуйович билан “Насаф” ҳимоячиси Рой Рок. Одам ҳайрон қолади, модомики, улар тиббий кўрикдан ўта олмаган экан ушлаб ўтиргандан не фойда? Клубда қолди дегани, йил охиригача унга ойлик маош берилди дегани эмасми?

Иккинчи давра арафасида икки жамоа ўз сафини биттадан футболчи билан тўлдириб олади. “Олмалиқ” ўз таркибида дарвозабон Валерий Фомичевни, “Бухоро” эса Максим Антонюк деган футболчини рўйхатдан ўтказади. Дарвозабон Фомичев иккинчи даврада 8та ўйинда майдонга тушиб, ўз дарвозасидан 11та гол ўтказиб юборган. Максим Антонюк эса “Бухоро” сафида фақат битта ўйинда майдонга тушади.

Хўш, бу футболчилар ўзбек футболи ривожига қандай ҳисса қўшган бўлишлари мумкин? Бундан ташқари, ўша йили уч футболчи олий лиганинг иккита клубида тўп тепган. Молдовалик Адриан Кашкавал биринчи даврада “Олмалиқ”да ўйнаб, иккинчи давра олдидан “Нефтчи”га ўтиб кетади.

Болгариялик Николай Чипев дегани биринчи давра “Динамо”да ўйнайди, кейин эса “Бухоро” таркибига бориб қўшилади. Шунингдек, Сергей Георгиев деган умуман таниш бўлмаган легионер дастлаб “Навбаҳор” билан шартнома тузади ва иккинчи давра арафасида у ҳам “Бухоро”га кўчиб ўтади. 2015 йил фақат 21 нафар футболчигина клубини ўзгартирмай мавсум охиригача битта жамоада фаолиятини ўтказган.

Эсингизда бўлса, ўшанда энг кўп хорижлик футболчи Молдовадан ташриф буюрганди. Уларнинг сони саккиз нафарни ташкил этган. Умуман олганда, 2015 йил 14 мамлакат футболчилари бизнинг чемпионатда тўп суришган. Хусусан Россиядан олтита, Сербиядан бешта, Украинадан тўртта, Беларусь ва Туркманистондан уч нафар, Черногория ва Грузиядан иккита ҳамда Тунис, Япония, Словения, Болгария, Руминия ва Босниядан биттадан.

Албатта, улар орасида ўзидан илиқ таассурот қолдирган футболчилар ҳам бўлган. Масалан, Евгений Черемисин “Нефтчи” таркибида яхши ҳаракат қилганини кўпчилик ишқибозлар эслайди. Туркманистонлик Арслонмурод Омонов “Олмалиқ” сафида барча 30 ўйинда майдонга тушиб, ўзини кўрсатганди.

Бундан ташқари, Сато Минори, Аднан Ораховац, Артур Геворкян, Дарко Станоевич, Неманья Яничич, Шакер Зуаги, Георги Квесиешвили, Кахи Махарадзе, Юрий Рижко каби легионерлар ҳам футболимизга нимадир бера олишди. Лекин шундай легионерлар борки, улар бекордан бекорга ўйнаб кетишди, клублар эса мўмайгина пулни тўлаб оғизларини ланг очиб қолаверган.

Олий лига-2015. Легионерлар статистикаси

Футболчи	Жамоаси	Амплуа	Т.сана.	Ўйин	Дақиқа	Гол	СК	ҚК
Евгений Черемисин (Россия)	"Нефтчи"	Дар.	29.02.1988	30	2700	-	2	0
Арслонмурод Омонов (Туркманистон)	"Олмалиқ"	Яр.ҳим	28.03.1990	30	1699	5	3	0
Адриан Кашкавал (Молдова)	"Олмалиқ" / "Нефтчи"	Ҳим.	10.06.1987	29	2610	4	3	0
Сато Минори (Япония)	"Бунёдкор"	Яр.ҳим	02.03.1991	28	2520	4	6	0
Геннадий Мошняга (Молдова)	"Андижон"	Дар.	25.04.1985	28	2520	-	1	0
Андрей Деркач (Украина)	"Қизилқум"	Яр.ҳим	28.05.1985	28	2417	3	9	0
Неманья Йованович(Сербия)	"Олмалиқ"	Ҳуж.	03.03.1984	28	2380	9	6	0
Аднан Ораховац(Сербия)	"Пахтакор"	Ҳим.	05.02.1991	27	2304	3	6	0
Микита Букаткин (Беларусь)	"Машъал"	Яр.ҳим	07.03.1988	27	2299	2	11	0
Николай Чипев (Болгария)	"Динамо" / "Бухоро"	Яр.ҳим	22.02.1989	27	2033	2	3	1
Артур Геворкян (Туркманистон)	"Насаф"	Яр.ҳим	22.11.1984	26	2280	11	2	0
Игорь Голбан(Россия)	"Қўқон-1912"	Ҳим.	31.07.1990	26	2268	1	8	0
Евгений Гоголь (Россия)	"Олмалиқ"	Ҳим.	20.01.1986	26	2210	2	5	3
Дарко Станоевич (Сербия)	"Шўртан"	Ҳим.	12.04.1987	25	2250	2	4	0
Неманья Яничич (Сербия)	"Локомотив"	Ҳим.	13.07.1986	25	2136	0	7	0
Шакер Зуаги (Тунис)	"Бунёдкор"	Яр.ҳим	10.01.1985	25	1909	7	4	0
Георги Квесиешвили (Грузия)	"Қизилқум"	Ҳим.	01.12.1985	25	1907	0	4	0
Кахи Махарадзе (Грузия)	"Пахтакор"	Яр.ҳим	20.10.1987	23	1819	6	2	1
Иван Милошевич (Сербия)	"Бунёдкор"	Ҳим.	03.11.1984	22	1862	0	4	0
Сергей Георгиев (Молдова)	"Навбаҳор" / "Бухоро"	Яр.ҳим	20.10.1991	17	1191	4	5	1
Андрей Мельничук (Украина)	"Динамо"	Дар.	14.11.1978	16	1363	-	2	0
Предраг Вуйович (Черногория)	"Андижон"	Яр.ҳим	20.08.1983	15	1337	2	1	0
Виталий Пламадела (Молдова)	"Бухоро"	Яр.ҳим	21.01.1985	15	1205	0	3	0
Вадим Кравческу (Молдова)	"Бухоро"	Яр.ҳим	07.03.1985	13	1141	0	3	0
Вячеслав Шевченко (Украина)	"Қизилқум"	Ҳуж.	30.05.1985	13	1115	2	2	0
Юрий Рижко (Беларусь)	"Навбаҳор"	Ҳим.	10.10.1989	13	1113	0	2	0
Рой Рок (Словения)	"Насаф"	Ҳим.	08.10.1986	12	974	1	1	0
Владислав Иванов (Россия)	"Машъал"	Ҳуж.	24.01.1986	12	947	5	0	0
Самир Бекрич (Босния)	"Бунёдкор"	Яр.ҳим	20.10.1984	12	490	0	1	0
Богдан Хауши (Руминия)	"Бухоро"	Ҳим.	29.09.1985	10	815	1	4	1
Александр Меленчук (Молдова)	"Навбаҳор"	Дар.	20.03.1979	10	777	-	1	0
Владимир Аргун (Россия)	"Қўқон-1912"	Яр.ҳим	06.05.1991	10	566	0	2	0
Руслан Корян (Россия)	"Локомотив"	Ҳуж.	15.06.1988	10	489	2	1	0
Валерий Фомичев (Беларусь)	"Олмалиқ"	Дар.	23.02.1988	8	655	-	0	1
Дамир Кояшевич (Черногория)	"Локомотив"	Яр.ҳим	03.06.1987	8	320	1	1	0
Александр Болиян (Туркманистон)	"Динамо"	Ҳуж.	27.07.1989	5	361	0	0	0
Константин Мандриченко (Молдова)	"Динамо"	Яр.ҳим	19.02.1991	4	234	0	0	0
Олександр Коблаш (Украина)	"Насаф"	Ҳуж.	05.09.1989	3	253	2	0	0
Максим Антонюк (Молдова)	"Бухоро"	Яр.ҳим	15.01.1991	1	57	0	0	0

2016 йил. 31 легионер

2015 йилги мавсумда легионерлар кўрсатган ўйиндан хулоса қилган клублар бир йил ўтиб сал мулоҳаза юритган ҳолда иш қила бошлашди. Буни жамоаларга таклиф этилган легионерлар сони камайгани ҳам айтиб турибди. 2015 йил олий лигада жами 39 легионер фаолият олиб борган бўлса, 2016 йилги мавсумда бу кўрсаткич 31ни ташкил этди. Демак, саккизта кам. Бу эса сондан кўра сифатга эътибор берилганини англатади. Қолаверса, легионер дарвозабонларга рухсат берилмаганини ҳам ёддан чиқармаслик жоиз.

Айтиш мумкинки, 2016 йил чемпионат тарихдаги энг яхшиларидан бири сифатида ёдда қоладиган бўлди. Аввало шу йили “Локомотив” ўз тарихида илк бор чемпионликни қўлга киритган бўлса, номига келиб ўйнаб кетган легионерлар кўп ҳам кўзга ташланмади. Айтиш мумкинки, ҳар бир клубда битта ё иккита легионер ўзини кўрсата олди. Хусусан Неманья Йованович “Қизилқум”да яхши мавсумни ўтказди. У 29 учрашувда майдонга тушиб, 13та гол урди. “Қўқон-1912”дан “Насаф”га ўтган Игорь Голбан ҳам ўзини кўрсатди, у ҳимоячи бўлишига қарамай, бешта тўп киритди.

Лекин “Локомотив”га ўтган Артур Геворкян зўр ўйнаб кетди дея олмаймиз. Жамоа гарчи чемпионликка эришган бўлса-да, Артур “Локо”да “Насаф”даги ўйинини намойиш эта олмади. Грузиялик легионер Кахи Махарадзе эса аксинча “темирйўлчилар” сафига ўтгач янада шаклланди. Керак пайтда ҳатто ҳимоя марказида ўйнаб жамоадошларига ёрдам берди. Сато Минори шу йили “Бунёдкор”да ўзининг энг эсда қоларли мавсумларидан бирини ўтказди дея оламиз. Бундан ташқари, “Олмалиқ”да Евгений Гоголь, “Машъал”да Андрей Деркач, “Навбаҳор”да Олександр Пишур ва айниқса “Бухоро”да Вадим Чемиртан каби легионерлар ўзларидан илиқ таассурот қолдиришди.

Олий лига-2016. Легионерлар статистикаси

Футболчи	Жамоаси	Амплуа	Т.санаси	Ўйин	Дақиқа	Гол	СК	ҚК
Неманья Йованович (Сербия)	“Қизилқум”	Ҳуж.	03.03.1984	29	2394	13	3	0
Игорь Голбан (Россия)	“Насаф”	Ҳим.	31.07.1990	28	2419	5	4	0
Артур Геворкян (Туркманистон)	“Локомотив”	Яр.ҳим	22.11.1984	28	1889	3	1	1
Евгений Гоголь (Россия)	“Олмалиқ”	Ҳим.	20.01.1986	27	2391	3	5	1
Кахи Махарадзе (Грузия)	“Локомотив”	Яр.ҳим	20.10.1987	27	2360	3	3	0
Аднан Ораховац (Черногория)	“Пахтакор”	Ҳим.	05.02.1991	27	2008	1	6	0
Сато Минори (Япония)	“Бунёдкор”	Яр.ҳим	02.03.1991	27	1978	5	4	0
Георгий Квесиешвили (Грузия)	“Қизилқум”	Ҳим.	01.12.1985	26	2283	2	1	0
Юрица Булят (Хорватия)	“Бунёдкор”	Ҳим.	12.09.1986	25	2250	0	10	0
Арслонмурод Омонов (Туркманистон)	“Олмалиқ”	Яр.ҳим	28.03.1990	24	1698	3	3	1
Андрей Деркач (Украина)	“Машъал”	Яр.ҳим	28.05.1985	22	1558	1	7	0
Владислав Павленко (Украина)	“Машъал”	Яр.ҳим	05.04.1994	21	1570	0	2	0
Александр Алемпиевич (Сербия)	“Бунёдкор”	Яр.ҳим	25.07.1988	20	1361	1	3	0
Неманья Яничич (Сербия)	“Локомотив”	Ҳим.	13.07.1986	15	1305	0	2	0
Дарко Гожкович (Сербия)	“Қўқон-1912”	Ҳим.	26.09.1986	14	1259	1	3	0
Олександр Пишур (Украина)	“Навбаҳор”	Ҳим.	29.01.1981	14	1123	5	2	0
Вячеслав Шевченко (Украина)	“Қизилқум”	Ҳим.	30.05.1985	14	1109	3	2	0
Никола Валентич (Сербия)	“Қўқон-1912”	Ҳим.	06.09.1983	13	1170	0	5	0
Денис Илеску (Молдова)	“Андижон”	Ҳим.	20.01.1987	13	1152	0	4	0
Драган Черан (Сербия)	“Насаф”	Ҳуж.	06.10.1987	13	955	12	3	0
Ярослав Мартинюк (Украина)	“Олмалиқ”	Яр.ҳим	20.02.1989	12	944	2	2	0
Огнен Красич (Сербия)	“Насаф”	Яр.ҳим	09.04.1988	12	943	3	2	0
Элман Тагаев (Туркманистон)	“Андижон”	Яр.ҳим	02.06.1989	12	775	0	1	0
Шакер Зуаги (Тунис)	“Бунёдкор”	Яр.ҳим	10.01.1985	12	738	1	2	0
Вадим Чемиртан (Молдова)	“Бухоро”	Яр.ҳим	21.07.1987	11	829	8	5	0
Дарко Станоевич (Сербия)	“Олмалиқ”	Ҳим.	12.04.1987	10	798	1	1	0
Деян Больевич (Черногория)	“Насаф”	Ҳим.	30.05.1990	7	562	2	0	0
Доржи Сангаджиев (Россия)	“Навбаҳор”	Яр.ҳим	19.02.1996	7	487	0	2	0
Андрей Бугняк (Молдова)	“Андижон”	Ҳуж.	30.03.1988	7	446	0	1	0
Чой Хюн Йеон (Ж.Корея)	“Навбаҳор”	Яр.ҳим	16.04.1984	4	196	0	0	0
Славен Степанович (Черногория)	“Локомотив”	Ҳуж.	02.11.1987	2	42	0	0	0

2017 йил. 37 легионер

Ниҳоят ўтган йилги мавсумга ҳам етиб келдик. Якунланган 2017 йилда жами 37 легионер клублар таркибида рўйхатдан ўтказилди. Демак, сон яна ошиб кетганини кўришимиз мумкин. Мана шу 37 легионердан 10 нафари чемпионат тугамасдан кетиб қолишди. Ўз юртига қайтиб кетишни “Шўртан” легионери Олександр Пишур бошлаб берди. У атиги учта ўйинда майдонга тушиб, нарсаларини йиғиштирди-ю, шартномасини бекор қилиб қайтиб кетди.

“Нефтчи” йил бошида учта легионерни қўшиб олганди. Аммо Вадим Абрамов бош мураббийликни қўлга олгач, ёзда уларнинг учаласига ҳам жавоб бериб юборди. Булар - Дмитрий Комаровский, Сергей Концевой ва Терентий Луцевич. Номларни қаранг! Булар ўзи футбол ўйнаганми деган савол юзага келади.

Легионер олиб келишда деярли хато қилмайдиган “Бунёдкор” бу йил негадир хатога йўл қўйди. Эҳтимол бу Сергей Лушаннинг қарори туфайли юз берган бўлиши мумкин, чунки биз биламизки, Миржалол Қосимов жамоага янги ўйинчи олаётганда доим етти ўлчаб бир кесишни маъқул кўради. “Бунёдкор” ўз сафига Душан Мичични таклиф этганди, аммо давралар оралиғида унинг кетишига тўсқинлик қилмади.

“Пахтакор” ҳимоячиси Юрица Булят ёзда Беларусь чемпиони БАТЭга ўтиб кетди. Шунингдек, “Қизилқум” ҳам ўз футболчиси Андрей Деркачга жавоб бериб юборди. “Локомотив” яхши ниятлар билан олиб келган Гнохере Кризо ўйнаб кета олмади. “Машъал” ҳам ёзда ўзининг икки легионери Владислав Павленко билан Умеджон Шариповга чиқиш эшикларини кўрсатди.

Иккинчи давра олдидан етти нафар футболчини клублар рўйхатдан ўтказишди. Энг кўп трансфер қилган жамоа “Пахтакор” бўлди. Бу жамоа 3+1дан тўлиқ фойдаланиб таркибга тўрт нафар хорижликни таклиф этди. Шундай қилиб Марко Симич, Тиаго Безерра, Гиди Канюк, Ростин Гриффитс кабилар “шерлар”га айланишди.

“Қизилқум” яна ҳеч кимга таниш бўлмаган Максим Юркуни рўйхатдан ўтказди. “Локомотив” эса ўйнаб кета олмаган Кризо ўрнини Олабиран Блессинг билан тўлдириб олди. “Машъал” ҳам бошқалардан ортда қолмай деб япониялик Томоки Мураматсу билан шартнома тузди.

Лекин ўзини кўрсатган легионерлар ҳам кўзга ташланди. Масалан, Драган Черан мавсумни юқори нотада ўтказиб, “Насаф”нинг иккинчи ўринни эгаллашига муносиб ҳисса қўшди. Қолаверса, у 19та гол уришга муваффақ бўлди. Шунингдек, Игорь Йелич, Кахи Махарадзе, Неманья Йованович каби футболчилар 29тадан ўйинда майдонга тушишди.

Энг кам ўйин ўтказган легионер Андрей Деркач бўлди. У бор-йўғи битта учрашувда ҳаракат қилди. Япониялик Мураматсу “Машъал” сафида ўн беш дақиқадан иккита ўйинда ўйнади, холос.

Олий лига-2017. Легионерлар статистикаси

Футболчи	Жамоаси	Амплуа	Т.сана	Ўйин	Дақиқа	Гол	СК	ҚК
Игорь Йелич(Сербия)	"Олмалиқ"	Яр.ҳим	28.12.1989	29	2528	5	6	0
Кахи Махарадзе(Грузия)	"Локомотив"	Яр.ҳим	20.10.1987	29	2398	1	3	0
Неманья Йованович(Сербия)	"Навбаҳор"	Ҳуж.	03.03.1984	29	1974	7	4	0
Драган Черан(Сербия)	"Насаф"	Ҳуж.	06.10.1987	28	2510	19	4	0
Артур Геворкян(Туркманистон)	"Қизилқум"	Яр.ҳим	22.11.1984	28	2393	5	1	0
Филипп Райевац(Сербия)	"Қўқон-1912"	Ҳуж.	21.06.1992	28	2286	7	4	0
Владислав Косминин(Беларусь)	"Олмалиқ"	Ҳим.	17.01.1990	27	2430	6	7	0
Владимир Баенко(Украина)	"Бухоро"	Ҳим.	09.02.1990	27	2430	3	12	0
Игорь Голбан(Россия)	"Насаф"	Ҳим.	31.07.1990	27	2430	3	4	0
Дарко Станоевич(Сербия)	"Навбаҳор"	Ҳим.	12.04.1987	27	2289	1	5	0
Аднан Ораховац(Черногория)	"Пахтакор" / "Динамо"	Ҳим.	05.02.1991	24	2092	4	8	0
Дарко Гожкович(Сербия)	"Қўқон-1912"	Ҳим.	26.09.1986	23	2045	3	6	0
Раду Рогак(Молдова)	"Динамо"	Ҳим.	07.06.1995	22	1843	1	1	0
Ивор Вейцер(Хорватия)	"Бухоро"	Яр.ҳим	24.05.1988	19	1143	4	5	0
Муҳаммад Коне(Кот-Д'Ивуар)	"Локомотив"	Ҳим.	12.12.1993	17	1244	0	6	0
Шота Григалашвили(Грузия)	"Олмалиқ"	Яр.ҳим	21.06.1986	17	788	1	2	0
Игорь Тиманюк(Беларусь)	"Машъал"	Ҳим.	31.12.1994	16	1300	1	4	1
Фарҳод Мусабеков(Қирғизистон)	"Олмалиқ"	Яр.ҳим	03.01.1994	16	841	0	0	0
Кирилл Пасичник(Қозоғистон)	"Бухара"	Ҳим.	24.05.1993	15	1270	1	2	0
Тиаго Безерра(Бразилия)	"Пахтакор"	Яр.ҳим	12.02.1987	14	1225	4	2	0
Гиди Канюк(Исроил)	"Пахтакор"	Яр.ҳим	11.02.1993	14	1021	1	1	0
Марко Симич(Сербия)	"Пахтакор"	Ҳим.	16.06.1987	13	1156	3	4	0
Дмитрий Комаровский(Беларусь)	"Нефтчи"	Яр.ҳим	10.10.1986	12	993	2	3	0
Вадим Чемиртан(Молдова)	"Бунёдкор"	Ҳуж.	21.07.1987	11	444	2	0	0
Юрица Булят(Хорватия)	"Пахтакор"	Ҳим.	12.09.1986	9	603	0	2	0
Сергей Концевой(Беларусь)	"Нефтчи"	Ҳим.	21.06.1986	8	720	0	3	0
Ростин Гриффитс(Австралия)	"Пахтакор"	Яр.ҳим	10.03.1988	7	521	0	2	0
Умед Шарипов (Тожикистон)	"Машъал"	Яр.ҳим	04.10.1992	6	196	1	0	0
ТерентийЛуцевич (Беларусь)	"Нефтчи"	Ҳуж.	19.04.1991	5	450	0	1	0
Душан Мичич (Сербия)	"Бунёдкор"	Яр.ҳим	29.11.1984	5	394	0	2	0
Олабиран Блессинг (Нигерия)	"Локомотив"	Яр.ҳим	07.08.1998	5	191	1	0	0
ОлександрПишур (Украина)	"Шўртан"	Ҳуж.	29.01.1981	3	169	0	0	0
Владислав Павленко(Украина)	"Машъал"	Яр.ҳим	05.04.1994	5	153	0	0	0
Максим Юрку(Молдова)	"Қизилқум"	Ҳуж.	01.01.1993	2	74	0	1	0
Гнохере Кризо(Кот-Д'Ивуар)	"Локомотив"	Ҳуж.	20.06.1997	2	39	0	0	0
Томоки Мураматсу(Япония)	"Машъал"	Яр.ҳим	10.07.1990	2	27	0	0	0
Андрей Деркач(Украина)	"Қизилқум"	Яр.ҳим	28.05.1985	1	26	0	0	0

Хулоса ўрнида

Мақола бошида айтиб ўтганимиздек, клубларнинг нима ният билан легионер олиб келаётгани бирламчи ўринда. Агар мақсад унинг Ўзбекистон футболига ёрдами тегади, ёшлар ундан ўрнак олади дейиш бўлса гап бўлиши мумкин эмас. Пулингиз етса, марҳамат, кучли легионерлар учун эшик ҳар доим очиқ.

Лекин легионерлар бошқа мақсадда олиб келинаётган бўлса, унда фақат айрим раҳбарларнинг фойда қилгани қолади. Клуб ва мухлислар, энг муҳими, ўзбек футболи бундан доим ютқазаверади. Шу боис бу йилдан барча клублар сон эмас, сифатга биринчи ўринда қарашса мақсадга мувофиқ бўларди.

Зеро, бекордан бекорга келиб бирон тузук ўйин кўрсатмай жарақ-жарақ пул олиб кетгандан кўра, ўша захира ўриндиғида ўзимизнинг қоракўзлар ўтиргани маъқул. Буёғи нима бўлиши клублар раҳбарлари-ю, бош мураббийларнинг виждонига ҳавола.