ЖЧ саралашдаги рақибимиз ҳам машғулотларни бошлади. Мураббий интервью берди

Бугундан Сингапур терма жамоаси ҳам машғулотларни бошлади. Жамоа бош мураббийи Татсума Йошида бўлажак ўйинлар учун 26 нафар футболчини таклиф этди. "Шерлар" 3 июнь куни Фаластин, 7 июнда Ўзбекистон ва 11 июнь куни Саудия Арабистонига қарши майдонга тушишади.

Таркибга назар ташлар эканмиз, уч нафар янги футболчини кўрамиз. Булар - Сайфуллоҳ Акбар, Ибраки Аднан ва ҳужумчи Илҳан Фанди. Терма жамоа устози Татсума Йошида йиғин олдидан шундай деди: 

- "Саудия Арабистонида бўлиб ўтадиган ЖЧ саралаш баҳсларига 26 нафар футболчи билан йўл оламиз. Таркибда уч нафар янги футболчи бор, ўйлайманки, улар ҳам ўзларини кўрсатади. Саудияга кетишдан олдин Дубайга бориб, у ерда Афғонистон билан ўйнаймиз. Ҳар икки жамоа ўзаро келишувига кўра, бу ўйин ёпиқ тарзда кечади. 31 май куни эса Ар Риёдда бўламиз". 

- "Ўтган бир йил давомида умуман ўртоқлик учрашуви ўтказмадик. Шу боис Афғонистон билан кечадиган баҳс биз учун муҳим ҳисобланади. Биз фақат шу ўйин орқали расмий баҳсларга тайёргарлик кўрамиз. Гуруҳдаги вазият ҳақида нима дейишим мумкин? Рақиблар кучли. Лекин шунга қарамай, биз ҳам ўзимизни кўрсатишга ҳаракат қиламиз. Мен учун энг муҳими, жамоам ҳар бир ўйинда майдонга чиқиб охиригача курашишини хоҳлайман. Мақсадимиз эса гуруҳда иккинчи бўлиш".