Жамшид Искандеров: "Олдиндаги ўйинларда чиройли ўйин кўрсатиб мухлисларни хурсанд қилишга ҳаракат қиламиз"

Тажрибали ярим ҳимоячи МТЖга чақирув, Корея чемпионатидаги фаолияти ва бўлажак ўртоқлик учрашувлари ҳақида ЎФА матбуот хизматига интервью берди.

"Ўтган йигинга таклиф кела олмаганимни сабаби клубим билан боғлиқ. Кореяда чемпионат ўйинлари давом этаётган эди, у ерда шундай қоида бор мамлакатдан ташқарига чиқсангиз қайтиб келиб ўн тўрт кун карантинда ўтиришингиз керак. Барибир одам бундан ранжийди. Чунки, миллий терма жамоага келиш ҳар доим ёқимли. Ҳозирда Жанубий Кореяда ички чемпионат баҳслари якунланди. Ўз юртимга қайтиб терма жамоа сафига қўшилганимдан хурсандман. 

Қисқа вақт ичида машғулотлар орқали спорт формамизни тиклаб олишга ҳаракат қиламиз. Кореядаги фаолиятим яхши кечмоқда. Бошида кўникишга 1-2 ой вақт керак бўлди. Жамоа раҳбарлари, мураббийлар яхши қабул қилди. Яхши чиқишиб кетдим. Барча шароитлар яратилган. Олдиндаги учрашувларда бирдамлик билан чиройли ўйин кўрсатишга ва мухлисларни хурсанд қилишга ҳаракат қиламиз. Ҳар бир ўйинда ғалаба қозониш учун ўйнаймиз", - дейди Жамшид Искандеров.