Иван Бошкович: "Бугун биз яхши рақибга мағлуб бўлдик, бундан трагедия ясаш керак эмас"

- Илк навбатда шуни айтишим керакки, бу ерга рақибни мағлуб этиш учун келгандик ва шунга мослаб стратегия тайёрлагандик. Бироқ дастлабки 15 дақиқаликда буни умуман амалга ошира олмадик ва бу мен учун афсусланарли бўлди. Нима сабабдан биз ўз дарвозамиз ёнида рақибга имкониятлар бердик, бунинг акси бўлиши керак эди. 20-дақиқадан кейин қандай ўйнаган бўлсак, шундай сценарий кутгандим. Тезкор гол ўтказиб юбордик, орадан бир неча дақиқа ўтиб ўзимизга келдик. Камчиликларсиз ўйнаб бўлмайди. Кейинчалик вазиятларимиз бўлди. Айниқса иккинчи бўлимда. Биринчисида ҳам голдан кейин яхши вазиятлар яратгандик. Рақибнинг иккинчи бўлимдаги илк зарбаси голга айланди. Бу маҳоратдан далолат. Кейин эса қайтиш учун кеч бўлди. "Пахтакор"ни ғалаба билан табриклайман. Биз учун очиқ ўйин кўрсатиш учун келгандик. Жамоа мен истаган ўйинни намойиш қилиб берди, бироқ 90 дақиқа давомида эмас. Шундай ҳолатлар бўлмаслиги учун ишлашда давом этиш керак. Режаларни бажариш лозим. Ўйинга бўлган эътибор, муносабат бўйича футболчиларимга эътирозим йўқ. Жамоа ёмон эмас, бироқ футболни деталлар ҳал қилмоқда. "Пахтакор" бугун нафақат чиройли ўйини, балки маҳорати эвазига ғалаба қозонди. Жамоам дастлабки 15-20 дақиқаликда вазифаларни бажара олмади.

- Жамоанинг ҳужумкор футболчилари кўп: Дориев, Хебайдан кейин Жалолиддинов ҳам ҳужумга қўшилди. Нега жамоанинг гол уриши қийин кечмоқда?

- Олдин ҳам айтганимдек бизда реализация асосий муаммо бўлиб турибди. Бугун ҳам 100 фоизлик вазиятлар бўлди. Футболда ҳеч бўлмаса ярим вазиятлардан фойдаланиш керак, шундагина очко олса бўлади. Фақатгина биз эмас, бошқа кучли жамоалар ҳам ўйинларда гол ура олмаслиги мумкин. Ҳужумдаги футболчиларимдан кўпроғини кутгандим. Бироқ уларнинг кимлигини яхши биламиз, улар ўзларининг ким эканлигини намойиш қилишган. Улар кейинчалик ўзларининг энг яхши ҳолатига кира олишади деган умиддаман. Иккинчи давранинг тўртинчи ўйинига келибгина гол ура олмадик. Биз ривожланяпмиз. Футболчиларим рақобатбардош бўлишини истайман. Биз шунчаки футбол кўрсатишни хоҳлаймиз.

- Рақиб таркибидаги тўпурар футболчилар, масалан, Игорь Сергеев жамоангизга руҳий зарба бўлдими?

- Менимча йўқ. У доимгидек оддий, совуққон ва жамоа учун ўйнайдиган футболчи. Игорь исталган нуқтадан гол урадиган футболчи эмас ва шу боисдан муаммо бўлмаслиги керак. 

- Жамоанинг ўйини ёмон эмас. Бироқ футболни алдаб бўлмайди. Жамоа сўнгги пайтларда кўп мағлуб бўлмоқда, шу сабабли очко йиғиш бўйича қандайдир назорат борми? Чунки жамоа тепага кўтарилиши керак.

- Рақиблар оддий эмас. Биз шунчаки ғалаба қозона олмаяпмиз дейиш нотўғри, рақиб ҳам футбол ўйнамоқда. Уларда ҳам яхши футболчилар бор. Рақиб бизга имконият бериши ёки биз рақибга имкон бермаслигимиз мумкин. Тушунаман, ғалаба энг муҳими. Чиройли футбол ортидан ғалабалар ҳам келади. Бироқ мураббий сифатида мен тактика, стратегия, режа, руҳий ҳолатга ҳам жавоб беришим керак. Руҳан муаммолар бўлаётганини кўрмаяпман. Биз ғалабаларга ишоняпмиз, футболчилар тепага кўтарилишга ҳаракат қилишяпти. "Пахтакор"га қарши сафарда ўйнаш осон эмас. Бугун биз яхши рақибга мағлуб бўлдик, бундан трагедия ясаш керак эмас. Биз мардонавор ўйин кўрсатдик. Ишлар ўхшамади, лекин олдинда ўйинлар бор, кейинги баҳсни Жиззахда ўтказамиз. Биламан, яхши меҳнат, тиришқоқлик ва чиройли футбол эвазига барчасини енгиб ўта оламиз, илк навбатда кубокка катта кучни ташлаймиз. Бироқ чемпионатда ҳам таслим бўлмаймиз. Чунки биз ўзимиз истаган жойда эмасмиз. Биламан, йил охирида биз керакли ва режа қилинган жойга чиқа оламиз.

- "Пахтакор" каби рақиб "Сўғдиёна"га қарши ўйинда ҳимоявий ўйин намойиш қилишини кутганмидингиз?

- "Пахтакор"дан бундай ўйин кутмагандим. Бироқ натижа учун шундай қилса бўлади. "Пахтакор"га қарши бундай ўйинда илк марта бўлишим. Бунақанги ҳолатни ҳеч ким кутмаганди. Иккинчи бўлимнинг дастлабки 30 дақиқасида улар дарвозамизга бирорта зарба бера олишмади. Бу мени қувонтиради. Лекин биз бу устунликдан фойдалана олмадик. Узун паслар ва тўп учун кураш ҳам 5ғга 50 вазиятлар ҳисобланади. Кимдир курашда мағлуб бўлса, ўша жамоа вазиятлар яратиши мумкин. Бу хоҳ "Пахтакор" бўлсин, хоҳ бошқа жамоа. Бундай ўйинни кутмагандим, шунчаки шундай бўлиб қолди. Улар 3 очкони шундай олишди. Биз ўз футболимиз орқали, улар ўз футболи орқали ўйнашди. Барча ўйинни унутади ва натижани эслайди.

- "Сўғдиёна"нинг ҳужумкор футболчилари ҳимояда ёрдам бера олмаслиги Сизни ҳавотирга солмаяптими?

- Бу мураббий сифатида менинг вазифам. Албатта, футболчиларнинг сифатлари турлича бўлади. Дориев ҳужумкор футболчилигини ва сифатли ўйнашини барча билади. Биз доимо бундай салбий ҳолатларни ҳимоявий футболчиларнинг катта юклама олиши билан ёпамиз. Шунда ҳам барча футболчиларнинг салбий ҳусусиятларини ёпишга ҳаракат қиляпмиз. Мавсум бошидан бери кучли жамоаларга қарши ўйнаяпмиз. Барча баҳсларда, бугун ҳам қайтишга ҳаракат қилдик. Кўп футболчилар янги, уларнинг балки жисмоний ҳолати бунга жавоб бермас. Лекин паслар, прессинг орқали бу ҳолатдан ўтамиз. Албатта, "Динамо"га қарши ўйин илк навбатда муҳим. Жалолиддинов бугун чарчагандек кўринди. Ҳали у ҳам ривожланиши керак. Биз кучли ўн бир футболчини танлаб олиб, очколар йиғишимиз керак.