Интервью. Умар Эшмуродов - "Насаф", чемпионлик, Катанец ва Черан ҳақида

"Аждарлар" бу йил таркибга бир нечта тажрибали футболчиларини қайтарди. Хусусан, мудофаа чизиғига Умар Эшмуродов жалб қилинди. Ўтган мавсумда Малайзияининг "Селангор" клубида тўп тепган футболчи яна "аждарлар" шарафини ҳимоя қилади. Эшмуродов янги мавсумга тайёргарлик ҳақида фикрлари билан бўлишди. 

- "Насаф" амалдаги чемпионликни ўзида сақлаб қолишга тайёрми?

- Албатта. "Насаф" бу йил ҳам барча турнирларда бош соврин учун кураш олиб боради. Туркиядаги йиғинимиз мавсумга тайёргарлик учун айни муддао ва фойдали бўлди дея оламан. Яхши жамоаларга қарши назорат учрашувларида майдонга тушдик. Чемпионат стартига қадар бироз вақт бор. Унгача камчиликларимизни тўғрилаб, жисмоний ҳолатимизни оптимал ҳолатга олиб чиқамиз.

- Чемпионлик йўлида қайси жамоани жиддий рақиб сифатида кўряпсиз?

- Суперлигада ҳар бир учрашувга жиддий қараб очко жамғариш талаб этилади. Ўз сафига яхши футболчиларни қўшиб олган футболчилар бор. "Пахтакор", "Нефтчи", "Навбаҳор", ОКМК, "Сўғдиёна" жамоаларидан худди биз чемпионлик учун курашишни кутмоқдаман.

- Бу йил Суперлигада 3 та Қашқадарё жамоаси ўйнайди. Қизиқарли дербилардан нима кутяпсиз?

- Яхши дербилар бўлиши шубҳасиз. Қашқадарёда футболга қизиқиш жуда юқори. Шу ўринда "Шўртан" ва "Машъал"ни Суперлигага чиққани билан табриклайман.

- Драган Черан ва Рубин Хебай бу йил нечта гол уради?

- Нечта гол уришини тахмин қилмайман, лекин жамоага катта фойдаси тегишига ишонаман. 

- Миллий терма жамоада Катанец даврида асосий ҳимоячи бўлдингиз. Ундан кўпроқ нимани ўргандингиз?

- Катанец кўп жабҳаларда ўсишимизга ёрдам берди. Айниқса жисмоний тарафлама ҳали кўп ишлашимиз кераклигини кўрсатиб кетди. Бу учун ундан миннатдормиз ва соғлик тилаймиз. Олдимиздаги ўйинларда ҳар бир рақиб хавфли. Биз тартибли ўйнаб максимал очко йиғишимиз лозим.