Иккинчи даврадан водийдаги ўйинлар ПФЛ сотиб олган янги камераларда трансляция қилинади

Championat.asia сайти маълумотига кўра, иккинчи даврадан эътиборан катта эҳтимол билан водийдаги Суперлига ўйинлари ПФЛ харид қилган камералар ёрдамида телетрансляция қилинади.

Айни вақтда профессионал камералар сони 4 та бўлиб, тез орада 2 та яна камера етиб келади. 

ПФЛ, шунингдек, Ўзбекистондаги мавжуд бўлган 4 та ВАР техникасининг (3 таси ЎзФҲМда ва  1 таси Термизда) ҳар бирига 2 тадан умумий 8 та камера сотиб олган. Мазкур камералар мавсум давомида ВАР техникаси билан ёнма-ён юради. Шундан келиб чиқилса, тез орада водийдаги футбол учрашувлари умумий ҳисобда 8 та камера орқали эфирга чиқарилиши мумкин. Бунга қадар МТРК аксар ўйинлар учун 4 та камера жалб қилаётганди. 

Шунингдек, айни вақтда Урганчдаги стадионга ҳам ВАР техникаси ўрнатилган бўлиб, ПФЛ унинг ёнига ҳам қўшимча 2 та камера сотиб олади. 

Маълумот учун, Қарши ва Ғузордаги футбол учрашувлари "Насаф" футбол клубига тегишли камералар ёрдамида телетрансляция қилинади. "Насаф" ва ПФЛ ўзаро ҳамкорликда МТРК учун тайёр сигнал тақдим этиб келмоқда.