Игорь Шквирин: "Истеъфога чиқарилганим ва ўрнимга янги мураббий келгани ҳақида эшитдим. Аммо..."

"Клубдан ҳали ҳеч ким менга кетишим тўғрисида айтгани йўқ. Истеъфога чиқарилганим ва ўрнимга янги мураббий келгани ҳақида эшитдим. Аммо раҳбарият мени чақириб ҳали ҳеч қандай гап айтмади. Чемпионатнинг сўнгги турини ўтказганимиздан кейин ҳаммамиз таътилга чиқдик. Мен ҳозирча сизга фақат шуларни айта оламан. Тўғри, жорий мавсумни жуда ёмон ўтказдик. Илгари бу қадар пастки ўринга тушиб кетмаган эдик. Бунинг ўзига яраша сабаблари бор. Қаердадир бир хатога йўл қўйдик, қайсидир ўйинларда омад биздан юз ўгирди. Табиийки, натижага мураббий жавобгар ҳисобланади. Мураббийнинг қисмати шунақа", - дейди Игорь Шквирин "Футбол Экспресс" газетасига.

Эслатиб ўтамиз, "Олмалиқ" клубига россиялик мураббий Виктор Кумиков тайинлангани ҳақида хабарлар чиққанди. Игорь Шквирин 2008 йилги мавсумдан буён "Олмалиқ" бош мураббийи бўлиб ишлаб келаётганди.