Игорь Криушенко "Шўртан"дан 95 минг АҚШ долларини ундиришига ишонади

Бу клуб кўпчиликдан қарздорлиги мавжуд эканлиги борган сари аён бўлиб бормоқда. Яқинда хабар берилганидек, “Шўртан”дан ҳақдорлар орасида белоруссиялик мураббий Игорь Криушенко ҳам бор. 2012 йилги мавсумда бир давра давомида жамоани бошқарган тажрибали мутахассис бугунги кунда Белоруссия миллий терма жамоасига устозлик қилиб келмоқда. Яқинда унинг клуб устидан ФИФАга арз қилганлиги маълум бўлди ва унга кўра 95 минг АҚШ доллари миқдоридаги пулини талаб қилмоқда. Бу борада “Шўртан” клуби мутасаддиларининг фикрлари тингланганди. Албатта, энди Кришуенконинг ҳам муносабатини билишимиз зарур эди. Шу сабабли ушбу мутахассис билан боғланишга қарор қилдик. Суҳбатимизни эса дабдурустдан мавжуд муаммодан бошлаб, унинг кайфиятини бузмасликка ҳаракат қилдик ва дастлаб ўзи, терма жамоадаги фаолияти ҳақидаги саволларни ўртага ташладик.

-   Игорь Николаевич, охирги пайтларда қандай ишлар билан машғулсиз?
-   Белоруссия терма жамоасига устозлик қилмоқдаман. Телефон рақамимни қидириб топиб, мен билан алоқага чиққанингиз учун раҳмат айтмоқчиман. Тўғриси, ўзим жуда ёқтириб қолган Ўзбекистондан қўнғироқ бўлишини кутмагандим.

-   Биласиз-ку, журналистлар ҳар ерда ҳозир-у, нозир бўлишни ёқтиришади. Улар бир ишга киришдими, охирига етказмасдан қўймайдилар. Терма жамоадаги ишларингиз яхшими?
-   Ҳа, яхши раҳмат. Бунга қадар асосан олий лигада ишлаб келаётгандим. Аммо терма жамоа устози Александр Хацкевич ишдан бўшаганидан сўнг жорий йил мартидан бошлаб бу ролда ҳам фаолият юритиб келяпман. Шунингдек, олий лига иштирокчиларидан бири саналадиган “Торпедо-БелАЗ” клубини ҳам бир пайтда бошқаряпман. Айтишим керакки, клуб билан тузган шартномам мавсум охирига қадар амалда бўлади. Шундан сўнг ҳаммасини муҳокама қилиб оламиз.

-    Белоруссия футбол федерацияси раҳбарияти миллий терма жамоада олиб бораётган ишингиздан қониқиш ҳосил қиляптими?
-   Менимча, ишим юзасидан ҳозирча ҳеч қандай эътироз йўқ. Акс ҳолда терма жамоада ишламаётган бўлардим. Албатта, мамлакатнинг бош жамоасига устозлик қилиш киши зиммасига жуда катта масъулият юклайди. Қолаверса, термада амалга ошириш керак бўлган ишлар талайгина. Асосийси, ҳамжихатликда олиб бораётган ишимиз натижаларда ўз аксини топмоқда. Биз ЖЧ-2018 саралаш босқичида Болгария устидан ғалаба қозондик. Сўнгра ўртоқлик мақомидаги учрашувда Янги Зеландия билан дуранг ўйнадик. Ўзингиз кўрган бўлсангиз, Океания минтақаси чемпиони яқинда Россия мезбонлик қилган Конфедерациялар Кубогида қатнашди.

-   Ўзбекистондаги фаолиятингизни қандай эслайсиз?
-   Фақат ижобий фикрларни билдиришим мумкин. Ўзбекистонда ишлаш менга ёқди. Фақат шуниси бироз алам қиладики, юртингиздаги фаолиятим узоқ давом этмади. Лекин атиги ярим йил ишлаган бўлсам-да, Ўзбекистонни жуда ёқтириб қолгандим. Айниқса, халқингизнинг меҳмондўстлиги ва самимийлиги мени ўзига ром этиб қўйганди.

-   Юртимиз ҳақидаги илиқ фикрларингиз учун ташаккур. Ўзбекистон терма жамоаси ҳақидаги фикрингиз қандай? Агар имкони туғилса, ўртоқлик мақомида биз билан беллашган бўлармидингиз?
-   Бажонидил бундай таклифга рози бўлардим. Ахир юртингизнинг бош жамоаси ҳар қандай рақиб билан беллаша олади. Бежизга Ўзбекистон терма жамоаси ФИФА рейтингида ҳам аксарият термалардан фарқли ўлароқ, яхши ўринлардан бирини эгаллаб келмаяпти. Ўзбек футболчилари ўз ишининг ҳақиқий профессионалларидир.

-   Аслида Ўзбекистонга келишингиз қандай амалга ошганди? Сизни ким таклиф этган?
-   Энди бу тарих. Боз устига орадан анча вақт ўтди. Албатта, таклиф клубдагилар томонидан юборилганди. Албатта, иш якунида бироз дилни хира қиладиган ҳолат юзага келган. Аммо бу унчалик муҳим эмас. Фурсатдан фойдаланган ҳолда “Шўртан” ва ўзбек футболига фақат омад тилаб қоламан.

-    “Шўртан”даги ишингиз учун ололмай қолган хизмат ҳақингизни ундириш мақсадида ФИФАга арз қилганингиз хусусидаги маълумотлар ҳақиқатга қанчалик яқин?
-   “Шўртан”дагилар билан бу масала юзасидан якуний хулосага келиб, ҳаммасини муҳокама қилиб олдик. Умид қиламанки, тез орада барча муаммолар барҳам топади. Хужжатлар билан боғлиқ масала ҳал бўлган, биз дўстона битим туздик.  

-   ФИФАга ёзган арзномангизда қарзингизни ундириб беришда ёрдам кўрсатишни сўрагансиз. 95 минг АҚШ долларини ундиришга ишонасизми?
-   ФИФА аралашувидан сўнг бироз муддат ўртада тушунмовчилик юзага келганди. Лекин якунда ҳаммасини келишиб олдик. Қарзни қистайвериб, клубни қийин аҳволга тушириб қўймоқчи эмасмиз. Бироз сабр қилишимизга тўғри келади. Ўйлайманки, дўстона битим тузганимиздан кейин ҳаммаси ижобий якунланади.

-   Умуман олганда, “Шўртан”нинг сиздан 95 минг доллар қарздор эканлиги ростми?
-   Очиғи, бундай маълумотлар ўртамизда қолишига келишиб олгандик. Чунки ҳаммасини ошкор этиш мумкин бўлмаган жиҳатлар ҳам бўлади. Ўйлайманки, клуб ва унинг ҳомийси ҳисобланадиган завод мутасаддилари ҳамма мажбуриятни охиригача бажарадилар. Ахир мен юқорида бу хусусида дўстона битим имзолаганимизни бежиз такрорлаб келмаяпман. “Шўртан” клуби, ЎФФ ҳаммасини ижобий ҳал этишидан умид қилиб қоламиз. Ўз навбатида биз бу масалани бошқатдан кўтармасликка қарор қилганмиз.

-   Яқинда “Шўртан” Урош Милославлевичнинг маошидан бўлган 13 минг долларга тенг қарзни тўлади. Шундан келиб чиққан ҳолда айтадиган бўлсак, сиздан бўлган қарз ҳам тез орада қопланса керак. Милославлевич билан юзага келган ҳолатдан хабарингиз бормиди?
-   Афтидан, унинг клуб билан ўзига яраша, бизнинг эса шунга лойиқ алоқаларимиз борга ўхшайди. Яна қайтараман: клуб билан бу хусусида тинчлик битимини имзолаганмиз. Агар ФИФА ўша арзномага биноан иш кўрганида “Шўртан”нинг жуда мушкул аҳволга тушиб қолиши тайин эди. Биз берилган ваъда амалга оширилгунга қадар кутишга қарор қилганмиз. Биз клубга ишонамиз. Яна бир бор эътироф қилиб ўтишимга тўғри келади: Ўзбекистонни, унинг халқини жуда ёқтириб қолганман. Юртингиздаги оз муддатли фаолиятим давомида менда фақат илиқ таассуротлар қолган холос. Молиявий масала билан боғлиқ муаммолар албатта ўз ечимини топишидан умид қиламан.

-   Охирги пайтларда “Шўртан”да мураббийлар тез-тез алмашаётганидан хабарингиз борми? Бундан ташқари, раҳбарият ва ўйинчилар борасида ҳам ўзгаришлар юз бермоқда. Умуман, бу ҳақида нималарни биласиз? Клуб билан боғланадиган одамингиз борми?
-   Биласизми, бу борада боғланиб турадиган адвокатлар бор. Агар мен билан боғланишни истайдиганлар бўлса, адвокатларим ёрдамида шу ишни бемалол амалга оширишлари мумкин. Яқинда клубнинг янги директори билан шу масала юзасидан гаплашдик. Дастлаб бир-биримизни унчалик тушунмадик. Бундан хайрон қолиш керак эмас. Чунки у жамоада янги одам. Лекин суҳбат асносида дастлабки тушунмовчиликдан асар қолмади. Биз доим мулоқот ва ўзаро келишув борасидаги таклифларга тайёрмиз.

-   Игорь Николаевич, футболдан ташқари спортнинг яна қандай турларига қизиқасиз?
-   (Кулади) Жуда яхши савол. Албатта, болалигимдан биринчи навбатда футболни ёқтирганман. Бўш пайтларимда китоб ўқиш жону дилим ҳисобланарди. Бизнинг Белоруссияда спортнинг кўплаб турлари жуда оммалашган. Аксарият дўстларим қатори мен ҳам футболдан ташқари спортнинг оммавий турларига қизиқардим. Лекин, барибир мен учун футбол биринчи ўринда турган. Қўйиб берса, эрталабдан то кечга қадар тўп ортидан чопиб чарчамасдик.

-   Футбол орқали эришган натижаларингиздан кўнглингиз тўладими?
-   Ўйинчи сифатидами ёки мураббий сифатидагисини назарда тутяпсизми?

-   Биринчи навбатда мураббий сифатидагисини назарда тутяпман...
-   Аксарият мураббийлар ортга назар ташлашни хуш кўрмайдилар. Мен ҳам шундай йўл тутишга одатланганман. Фақат олдинга интилишга ҳаракат қиламан. Боз устига кишига ўзини олдинда нима кутаётганлигини билиш имконияти берилмаган. Эҳтимол, Ўзбекистон терма жамоасини бошқариш ҳақидаги таклифни олишим мумкин. Бундай пайтда дабдурустдан хулоса чиқариш ярамайди. Агар шундай таклифни оладиган бўлсак, аввало ўйлаб кўрамиз.

-   Натижаларга эришиш йўлида спортчиларга хос овқатланиш қандай роль ўйнайди?
-   Замонавий футбол шу даражада тараққий этганки, унда кўзга кўринмас майда-чуйда жиҳатларнинг ўзи йўқ. Албатта, терма жамоа ва клуб миқёсида футболчиларнинг емоқ-ичмоғига жавоб берадиган алоҳида мутахассислар жалб этилган. Замонавий футбол учун арзимасдек кўринадиган жиҳат қолмаган, десам муболаға қилмаган бўламан. Футболчининг машғулотлар ва ўйинларга тўла тайёр бўлишида овқатланиш жуда муҳим аҳамиятга эга.

-   Агар имконият ҳавола қилиниб, футболда ўзгартиришни истаган қоидангиз бўлса, ишни қайси қоидани ўзгартиришдан бошлаган бўлардингиз?
-   Жуда қизиқарли савол. Агар ўйинларни ғалаба билан тамомлар экансан, қандай қонун-қоидалар эвазига натижага эришганингнинг қизиғи бўлмайди. Башарти мағлубиятга учрар экансан, у ҳолда футболдаги қатор қонун-қоидаларни ўзгартиришни истаб қоласан. Аммо мен ўйиндаги барча қоидалар шундайлигича қолишини хоҳлардим. Бежизга футболда шундай гап юрмайди: энг муносиб жамоа ғалаба қозонади.

-   Ўзбек футболи ва ишқибозлари ҳақида нима деган бўлардингиз?
-   Ўзбекистонда футболни жуда севишади. Мен бунга ўз тажрибамдан келиб чиққан ҳолда муносабат билдиряпман. Ўзбек футболсевар мухлисларига тилагим шундай: терма жамоангиз ўзи орзиқиб кутаётган жаҳон чемпионатига чиқсин. Барчангизга мустаҳкам соғлик ва ишларингизда ривож тилаб қоламан. Асосийси, Ўзбекистонда азалдан футбол борасида ўзига яраша анаъналар мавжуд. Мана шундай анаъналар давом этаверсин.

-   Собиқ Иттифоқ парчаланиб кетганидан сўнг унинг таркибидаги мамлакатларда футбол қандай ривожланди? Мен Россия, Ўзбекистон, Украина ва яна бир қанча давлатларни назарда тутган ҳолда шундай савол билан мурожаат қилмоқдаман.
-   Бу савол билан нимани назарда тутаётганингизни тушуниб етдим. Менинг бу борадаги фикрим қуйидагича: МДҲ давлатлари орасида Украина футболининг мавқеи анча баланд. Аммо бу гап билан Ўзбекистон футболи савияси анча ортда қолган, демоқчиман эмасман. Азалдан ўзбек футболчилари ўйинга бўлган иштиёқлари билан ажралиб турганлар. Асосийси, мамлакатингиз бош жамоаси, ўсмирлар ва ёшлар термаси натижаларни кўрсатиб келмоқда. Клубларингиз ҳам қитъа миқёсидаги мусобақаларда ўзларидан ёмон таассурот қолдирмаяптилар.

-   Собиқ футболчи ва эндиликда миллий терма жамоа устози сифатида ФИФА томонидан амалга татбиқ этила бошлаган видеотакрорла ҳақидаги фикрингиз қандай?
-   Бу саволга жавоб қайтариш анча мушкул иш ҳисобланади. Фақат шуни айтишим мумкинки, мониторлар қаршисида ўтирган мутахассислар якуний қарорни чиқаришда камдан-кам ҳолларда хато қилишсин.

ФИРДАВСХОН