Ҳамюртларимиз Тимур Сегизбаевнинг юбилейида қатнашишди

"Си Син Хай" стадионида Сегизбаевнинг 75 ёшига бағишлаб фахрийлар ўртасида мини футбол мусобақаси ташкил этилди. Ушбу тадбирда ўзбекистонлик собиқ футболчилар Биродар Абдураимов, Тўлаган Исоқов ва Шамил Яфаров иштирок этиб қайтишди. 

Биродар Абдураимов:

– Тимур Санжарович билан Тбилисидаги Собиқ Иттифоқ спартакиадасида танишганмиз. Ўшандан буён дўстмиз. Бунга қадар Тошкент ва Олма-Отада бир неча бор тўқнаш келганмиз. Футболда рақиб, ҳаётда эса дўстмиз. Унга соғлиқ ва узоқ умр тилайман.

Тўлаган Исоқов: 

– Мен жуда бахтли инсонман. Сабаби уч авлодни кўришга муваффақ бўлганман. Биринчиси Биродар Абдураимов, Тимур Сегизбаев авлоди. Ундан кейинги авлод Доценко, Бекташов. Охирги авлод бу "Пахтакор-79" бўлган. Тимур Сегизбаев нафақат Қозоғистон балки Ўзбекистон футболининг ҳам фахри ҳисобланади. Сабаби футболдан кейин Қозоғистонда бешбармоқ, Тошкентда ош ер эдик. Унга соғлиқ тилайман.

Маълумот учун

Тимур Сегизбаев Қозоғистон футболиниг тирик афсоналаридан бири. У фаолиятини "Қайрат"да бошлаб, ўша ерда тугатган. Ярим ҳимоячи кўп маротаба Тошкентнинг "Пахтакор" жамоасига қарши майдонга чиққан. Унинг ҳисобида 212та учрашув бўлиб, олмаоталиклар сафида 19 маротаба рақиблар дарвозасини ишғол қилган. 

1973-79 йиллар оралиғида жамоа бош мураббийи сифатида фаолият олиб борди.

Фото: Эдуард Гавриш