Ҳаким Фузайлов: "Шогирдларимга охиригача курашишгани учун раҳмат айтаман"

- Ўйин ҳақида фикрингиз?

- Учрашувни барча кўрди, биринчи тайм тўлиқ устунлигимиз остида кечди. Рақибда деярли имконият бўлмади. Фақат ўзимизга ўзимиз пенальти олиб келганимиз чатоқ бўлди. Умуман олганда эса ўйинни яхши ўтказдик. Лекин барибир гол уриш билан боғлиқ муаммодан чиқиб кета олмаяпмиз. Бунинг устига футболчимиз қизил карточка олиб ўйинни 10 киши бўлиб тугатдик. Лекин бу ҳакамнинг қарори ва мен муҳокама қилмайман. Шогирдларимга охиригача курашишгани учун миннатдорчилик билдираман. Чемпионат давом этади, имконият бор экан курашамиз.

- Бугун жамоангиз қай даражада жисмоний курашлар уддасидан чиқди?

- Аввал ҳам айтгандим, биз жисмоний томонлама тайёрмиз. Жамоамиз бу борада ёмон кўринмаяпти. Тўпга кўп эгалик қиламиз, агар футболчилар толиқиб қолганида бундай бўлмасди. Қанотларимиз ҳам яхши ишлаяпти, фақат захира ўриндиғимиз тор ва буни ҳар доим ҳис қиляпмиз. Мана энди ФИФА кунлари бошланади, бироз дам олиб сўнг яна машғулотларга қайтамиз.

- Диёрбек Ортиқбоевнинг четлатилиши ўйинга қандай таъсир қилди?

- Бундай ўйинда бир киши кам қолиб курашишда давом этиш осон эмас. Айтиб ўтганимдек, қизил карточка борасида ҳакам қарор қабул қилди. Биз эса курашишда давом этдик. Айтишим мумкин, охиригача фақат ғалабани ўйлаб ҳаракат қилдик.