"Футбол ретро талқинда" (95-сон)
01 окт 2021 22:30
Новости

"Футбол ретро талқинда" (95-сон)

Ушбу рукнимиздан тарихга айланган, аммо ҳар бир футбол мухлисига завқ бағишлайдиган фотосуратлар жой олади.

Лоҳиҳамиз катта танаффусдан сўнг яна қайтди. Бундан буён ғойибона тарзда тез-тез қаршингизда пайдо бўлишга ҳамда сизнинг қўллаб-қувватловингиз ва фаоллигингиз эвазига ривожланиб боришга ҳаракат қиламиз.

Мақсадимиз — эски даврга оид суратларни футбол ихлосмандларига тақдим этиб, уларга таниш воқеаларни эслатиш ҳамда янги, қизиқарли воқеликлар, статистик кўрсаткичлар, фактлар билан бўлишиш.

1982 йилги "Олтин тўп" соҳиби Паоло Росси ва Польшанинг икки карра энг яхши футболчиси Збигнев Бонек. “Ювентус”. 1985 йил.

Маълумот учун, Бонек айни пайтда Польша футбол ассоциацияси раҳбари саналади.

P.S. Формаларга эътибор бермайсиз, улар “Ливерпуль” футболчилари билан либос алмашиб олишган.

Италия терма жамоаси. 1988 йил.

Икки карра ЕЧЛ ғолиби ("Бавария", МЮ) – Оуэн Харгривз. PlayStation шинавандалари кучли зарба соҳибини яхши эсалашади.

6 ўйинда 6 та ғалабага эришиб, жаҳон чемпионига айланган Бразилия термаси. 1970 йил.

Франциялик таниқли футболчилар Давид Жинола ва Марсель Десайи. 1995 йил.

Маълумот ўрнида, Десайининг ҳақиқий исми – Оденке Аббей. У Марсель номини оиласи Францияга кўчиб келиб, онаси франциялик дипломатга турмушга чиққанда олган.

Франциянинг 2008 йилдаги энг яхши клуби – "Лион.

Фаолияти давомида бирор марта қизил карточка олмаган аргентиналик ҳужумчи Эрнан Креспо ("Ривер Плейт"). 1996 йил.

Англия футболида қизил карточкага энг кўп (13 марта) лойиқ кўрилган ярим ҳимоячи – Рой Кин.

Пеле томонидан тузилган "ФИФА 100" рўйхатидан ўрин эгаллаган ягона колумбиялик – Карлос Вальдеррама.

Маълумот учун, "ФИФА 100" — ташкилотнинг 100 йиллигига бағишлаб, энг яхши футболчилардан тузилган ўйинчилар рўйхати. Пелега танлаш учун 300 та футболчидан иборат рўйхат тақдим этилган. "Футбол қироли" эса 100 та эмас, 175 кишини танлаб олишга қарор қилган.

Битта сурат — учта "Олтин тўп".

Изоҳ: суратда "Олтин тўп"ни 1 марта ютган Христо Стоичков ва 2 марта юксак мукофотга сазовор бўлган Роналдо келтирилган.

ЕЧЛ: "Милан" – "Реал" 1:1. Тўп учун курашда ЖЧ-2006 ғолиби, ҳимоячи Массимо Оддо ва 2007 йилги "Олтин тўп" эгаси Кака. 2009 йил.

ЖЧ-1966. Франция – Мексика 1:1.

Франция терма жамоасининг ўйинолди сурати.

Тепа қатордагилар: Габриэль де Мишель, Жан Жоркаефф, Робер Будзинский, Бернар Боскье, Марсель Обур, Марсель Артелеса (сардор).

Пастки қатордагилар: Нестор Комбен, Жозеф Боннель, Филипп Гонде, Робер Эрбен, Жерар Хауссер.

"Болонья" – "Фиорентина". Италия чемпионати юлдузлари Роберто Баджо ва Габриэль Батистута саломлашишмоқда. 1997/98 йилги мавсум.

ЧЛ. 1/4 финал жавоб ўйини: "Ювентус" – "Реал" 2:0.

Даниянинг икки карра энг яхши футболчиси Микаэль Лаудруп Италиянинг икки карра энг яхши ўйинчиси Алессандро Дель Пьеродан қочиб кетмоқда. 1996 йил.

2000 йилги Европа чемпионати: Норвегия - Испания. Ҳужумчи Стеффен Иверсен Норвегияга гуруҳ босқичи 1-турида Испания устидан ғалаба келтирмоқда.

"Бавария"дан "Интер"га ўтган Карл-Хайнц Румменигге Бундеслина тўпурари совринини қабул қилиб олмоқда. 1983/84 йилги мавсум тўпурарига айланган Румменигге ўшанда 26 та гол урган.

"Боруссия"га қарши Чемпионлар лигаси финалида "Ювентус"ни қўллаб-қувватлаш учун келган мухлислар. 1997 йил.

Якунда дортмундликлар 3:1 ҳисобида ғалаба қозониб, чемпион бўлишган.

Пике, Фабрегас, Месси, яна кимнидир танидингизми?

2005 йилда Франк Рибери Франциянинг "Мец" клубидан бошқа мамлакат жамоаси – "Галатасарой"га ўтган.

Франциялик Истанбул клубида 17 ўйинда қатнашиб, 1 та гол урган ва Туркия кубогини ютган. Эътиборлиси, ушбу соврин Риберининг фаолиятидаги биринчиси эди.