ФИФА Жаҳон чемпионати иштирокчилари сонини оширмайдиган бўлди

Аввалроқ хабар қилинганидек, ФИФА президенти Жанни Инфантино ФИФАнинг Trump Tower’даги офисида Уругвай ва Парагвай раҳбарлари, КОНМЕБОЛ президенти ҳамда Аргентина, Уругвай ва Парагвай федерациялари президентлари билан учрашган. Улар ўтган йилнинг март ойида ФИФА кенгаши йиғилишида Уругвай футбол ассоциацияси томонидан норасмий равишда илгари сурилган таклифни илк бор расман муҳокама қилишган.

ФИФАнинг расмий нуқтаи назари шундан иборатки, у барча манфаатдор томонлар билан жаҳон чемпионатини кенгайтириш масаласини муҳокама қилади, чунки ташкилот кенгашда илгари сурилган таклифларни кўриб чиқиши шарт.

Бироқ, The Guardian хабар беришича, парда ортида турнирни кенгайтиришнинг мақсадга мувофиқлигига шубҳа мавжуд. Қарор ФИФА кенгаши томонидан қабул қилинади, унинг йиғилиши келаси ойда Цюрихда бўлиб ўтади. Жаҳон чемпионатини кенгайтириш масаласи кун тартибига киритилмаган.

"Жанни ўзи хоҳлаган тақдирда ҳам кенгашда овоз беришни ўтказмаган бўларди. Иштирокчиларнинг аксарияти 64 жамоа иштироки жаҳон чемпионатига путур етказади, деб ҳисоблайди. Қизиқарсиз ўйинлар жуда кўп бўлади ва бу бизнес моделга зарар етказиши мумкин," - деб таъкидлади Халқаро футбол федерациясидаги манба.

Таъкидланишича, КОНМЕБОЛ ўзгаришларнинг асосий манфаатдори бўлиши мумкин. 64та жамоагача кенгайиш ФИФАга аъзо 211та ассоциациянинг 30 фоиздан ортиғининг иштирок этишини, табиийки улардан кўпроқ терма жамоа қатнашишини англатади.