Фарҳод Нишонов: "Суперлига бўлсин, Про лига бўлсин, ҳамма натижа учун ўйнаяпти. Ҳеч ким мухлислар учун футбол ўйнагани йўқ"

- Ўйин ҳақида 

- Ўйин ҳақида гапирадиган бўлсак, рақиб ютиш учун ҳеч нарса қилмади. Биз ўзимизнинг хатоларимиз эвазига голлар ўтказиб юбордик. Ўйинни назорат қилдик, вазиятлар яратдик, аммо улардан фойдаланишда совуққонлик етишмади. Машғулотларда буни устида ишлаяпмиз. Ўйлайманки, бу ҳолат ўйиндан ўйинга яхшиланиб боради ва голлар уриб, ғалаба қозонамиз.

- Жамоа таркибида бир-икки футболчилар кўриниш бермади. Бунга сабаб нима эди?

- Жамоа асосий таркибидан ҳеч кимга жой кафолатланмаган. Биз келажакни ўйлаган ҳолда иш тутамиз. Айримлар тартиб-интизомга риоя қилмади. Биз уларни интизомни тўғрилаш мақсадида қайдномага киритмадик. У хоҳ жамоа етакчиси бўлсин, хоҳ сардор бўлсин, қонун ҳамма учун бир хил. 

- Жамоа олдига Кубокда қандай мақсадлар қўйилган?

- Ҳар бир ўйинда ғалаба учун ҳаракат қиламиз. Суперлига бўлсин, Про лига бўлсин, ҳамма ўзи учун, натижа учун ўйнаяпти. Ҳеч ким мухлислар учун футбол ўйнагани йўқ. Бу жуда ёмон. Мухлис нима учун ўйинларни кўриш учун келмаяпти? Бўш трибуналарда футбол ўйнаш футболчиларга қизиқ эмас. Суперлига ва Про лига баҳсларини кўряпмиз, мухлислар йўқ. Бир нафар мухлисимиз бўлса, биз ўша мухлис учун чиройли футбол кўрсатишга ҳаракат қиламиз. Натижага чиройли футбол орқали эришмоқчимиз. Тан олишимиз керак, бу йўқолиб кетаётган нарса. Мухлислар ҳозир футболга эмас, 10 карра кўпроқ пул сарфлаб, тоққа бориб дам оляпти. Биз мухлислар футболга келиб роҳат олишларини хоҳлаган бўлардик. Биз шу йўлдамиз. Кубок ўйинларида ўз футболимизни намойиш қиламиз. Ишонаманки, Ўзбекистон терма жамоаси ва топ-клубларда ўйнайдиган футболчиларни етказиб берамиз.