Эшитдик-да: ПФЛ ўтган йил якунлари ҳамда янги мавсумга бағишлаб катта йиғилиш ўтказади

Бунда ўтган мавсум якунлари кенг таҳлил қилинади, шунингдек, янги мавсум олдидан мақсад ва режалар кенг жамоатчиликка маълум қилинади. 

Яхши биласиз, ўтган йилнинг ёз ойида ЎФА раҳбариятида ўзгариш рўй берганидан сўнг автоматик равишда ПФЛда ҳам ўзгариш бўлди. Лекин янгиланган ПФЛ ҳозирча катта йиғилиш ташкил қилиб ОАВ вакиллари билан суҳбат қургани йўқ. Афтидан шундай йиғилиш шу йилнинг февраль ойида, то янги мавсум старт олгунга қадар бўлиб ўтади. 

Катта эҳтимол билан йиғилишда барча турдаги ОАВ ходимлари таклиф қилинади. Бунда бир қатор саволларга жавоб олиниши, хусусан ўтган мавсумнинг плюс ва минус томонлари, янги мавсумда Суперлигада аниқ нечта жамоа қатнашиши, қуръа қачон бўлиши, бу йилги Суперлига қайси ном остида ўтказилиши, Про лига формати ва бошқа саволлар борасида ПФЛ раҳбарияти томонидан маълумот берилиши кутиляпти. 

Фақат ҳозирча ушбу катта йиғилишнинг қачон ва қаерда бўлиб ўтиши эълон қилингани йўқ.