Диёр Имомхўжаев: Футбол мухлислар учун дейишади, аммо айтганларига амал қилишмайди

Бизнинг шароитда бунга ажабланмайман. Исталган клубни олиб қарасангиз, матбуот котиби катта ҳажмдаги ишни бажаради. Бироқ мукофот пуллари ёки иш ҳақига келганда энг охирида тилга олинади. Меҳнати ҳалол, гўшти ҳаром деган гап бўлармидим?

“Пахтакор” раҳбариятида ўзгариш юз бергач, клуб медиасига бўлган эътиборда ижобий ўзгаришлар кутдим. Жамоа Арвеладзе билан Туркияга жўнаб кетгач эса бу мавзуда деярли ҳеч нарса ўзгармаётганини тушундим.

“Пахтакор” матбуот хизматида бир вақтнинг ўзида икки-уч ишни бажара оладиган матбуот котиблари бор. У ҳам расмга олиши, ҳам турли хил материаллар тайёрлаши, футболчилар билан суҳбатлар, интервьюлар уюштириши, штабни энг сўнгги янгиликлардан воқиф қилиб туриши мумкин. Замонавий футбол клублари бу масалага жиддий эътибор беради. Менимча бу ҳолат клуб ўз мухлисларини қанчалик ҳурмат қилишидан келиб чиқса керак. Оддий мисол, Москванинг “Локомотив” клуби медиаси билан танишиб кўринг. Ўйиндан фоторепортаж, Виталий Денисов иштирок этган акция, учрашув қайдномаси, матбуот анжуманлари, киритилган голлар — ҳаммаси бир неча соат ичида рўй беради ва кетма-кетликда, тезкорлик билан жамоатчилик учун тақдим этилди.

Тўғри, медиа бўлимида бир неча киши фаолият кўрсатади, дерсиз. Бироқ ўзимизда ҳам шундай ҳаражатларни кўтара оладиган клублар бор. Аммо жамоаларимиз хорижда қандай ўйнаётгани, нималар билан машғул экани, футболчилар ўзини қандай ҳис қилаётгани ва қатор шунга ўхшаш масалалар ҳақида мухлислар кўп ҳам билавермайди. Медиа ва клуб уртасида узвийлик камдек туюлади. Нега?

“Пахтакор” сингари клублар учун медианинг биргина вакилини делегацияга қўшиб олиш катта қийинчилик туғдирмайди. Бегона журналистни эмас, ўз клубида ишлаётган котиби ҳақида айтмоқдаман. У мухлисларга маълумот беради: қаерда яшаётгани, “Истанбулспор” ким ва унга қарши ўйин қандай ўтгани, гол қайси дақиқада урилгани, пенальтига нима сабаб экани ва ҳоказо. Учрашувдан кейин Арвеладзедан, Лобановдан интервью олади, фикрини билади. Бир ўзи расмга тушириши, қайднома ёзиши, ижтимоий тармоқлар ва мессенжерлар билан ишлаши, сайтга материал жойлаши мумкин. Яхшироқ қаралса, ҳаммадан кўпроқ ишлаётган ҳам бўлиб чиқар.

Бу шунчаки спаринг рақибга қарши ўйин-ку дерсиз, лекин футбол мухлислар учун ўйналса, улар жамоанинг шу соҳадаги ҳар бир нафасини билиб туриши ёмон эмас. Бизда эса клублар ўз мухлислари қаршисига чиқиш ўрнига, улардан тобора узоқлашаётгандек, футболчиларни топга олиб чиқадиган соҳа вакилларига тузукроқ эътибор йўқдек туюлади. “Пахтакор” ким билан ўйнаганини билдик, лекин таркиб берилиши, голнинг дақиқаси, расмлар борасида олсак, матбуот хизмати анчагина қийналгани яққол кўриниб турибди.

Клубларда бир тийинлик фойдаси йўқ, шунчаки ойлик олиб юрган одамлар бор, уларнинг айримларим сафарларга ҳам боради. Хўш, бундан қандайдир фойда борми? Балки медиа соҳаси ривожлантирилса, жиддийроқ қаралса, клубнинг асл юзи кўринган, мухлислар секин-аста стадионга қайтишни бошлаган бўлармиди. Ўйинлардан олдин афишалар, анонслар, алоҳида лойиҳалар жуда кам, балки йўқ ҳамдир. Чунки бунга келганда пул йўқ, медиа рағбатлантирилмайди. Ҳакамлар учу ва бошқа кераксиз ҳаражатлар учун пул топилади, бироқ энг керакли жиҳат оқсайди. Бизда ўйин натижаси муҳим, пул чиқим қилдикми, натижа тезроқ бўлиши керак. Медиа бажараётган вазифа ва унинг фойдаси кўзга кўринмайди, аниқроғи, бу соҳани тушунмайдиган инсон кўра олмайди. Ўйлаб кўрмайдики, нега Европа клублари айнан шу соҳага миллионлаб чиқим қилади ва биз нега бошқа йўлдан юрамиз.

Эътибор шундай бўлганидан кейин, шалтоғи осилиб ётган қайсидир клуб матбуот хизматини қизиқчилар эгаллайди, котиб чиқиб, спорт журналисти устидан расмий сайтда фельетон десанг унча ўхшамайдиган, юмалоқ мақола десанг, хотинчалишларнинг гапига кўпроқ ўхшаб кетадиган нарсалар ёзаверади. Ўқимаган, билмайди матбуот хизмати нима, унга нималар мумкин-у нима йўқ, нима ярашади, нима абгор қилади... Муҳими ўйин натижасини сайтга қўйиб, учрашувдан кейин матбуот анжуманини ўтказиб берса, иши ҳал. Шу ҳам ишми энди?

Агар қайсидир соҳани ривожлантиришни истасак, унда майда нарсаларга қадар эътиборда бўлиши муҳим. Медиа ривожланган мамлакатларда энг асосий ишни, миссияни бажаради. Биз эса унга энг охирги кўз билан қарашда давом этиб келамиз. Таркиб ва раҳбарият алмашавериши мумкин, аммо клуб бренди, номи учун ҳамма бирдек курашиши шарт. Кўрдик, “Дўстлик” кучли бўлган йилларни, “Бунёдкор” чиқди, “Пахтакор”, “Локомотив”... Яна кимлардир чиқиши мумкин олдинда, кучли футболчиларни, мураббийларни олиб келар эҳтимол. Нимаики қилмасин, агар ўша клуб жамоатчилик билан алоқаларни ривожлантирмаса, замонавий футболга ҳали қадам қўймапти.

Биз ҳозирча қандайдир клублар билан ўйнаб, Туркияга кетган кимлардандир ялиниб, бир амаллаб таркибларни олиб юрибмиз. Ҳатто ўша Россия клубларидан ҳам бир неча йил ортда қолиб кетганмиз. Олий лигадаги ўртамиёна футболчининг исмини ёзсангиз, google 1-2 та расво сурат чиқариб берса, катта гап. Умуман чиқармаса ҳеч ким ажабланмайди ҳам. “Championat.asia” ёки “Sports.uz” дейлик ўз суратларига сайт номини ёзиб қўйса бу тушунарли, муаллифлик ҳуқуқи бор. Клубларда шу аҳвол бўлса, кулгули. Сенга нима фарқи бор клуб номи расмда туришини, олаётган нашр ҳавола бериб, ундан фойдаланса бўлди эмасми, сен нима учун ишлаяпсан ўзи? Ундан кўра постерлар, ашифалар тайёрла ва унинг исталган жойига клуб логотипини жойлаштир. Йўқ, биз ўйиндан олинган суратларга ҳам қўйиб чиқамиз. Хуллас, боримиз шу деб ўтираверамиз. Ваҳоланки кўзимизни очсак, имкониятларимиз етарлича.