"Пахтакор" – "Динамо" учрашувидаги вазият атрофида мунозара: ЎзФҲМ ва Championat.asia сайтининг ҳакамлик бўйича эксперти қандай фикрда?

Championat.asia сайтининг ҳакамлик бўйича эксперти, россиялик собиқ ҳакам Анатолий Синяев ("Алё, рэф!" Telegram канали) кеча бўлиб ўтган Ўзбекистон Кубоги ярим финалидан ўрин олган "Пахтакор" – "Динамо" учрашувида меҳмон жамоага пенальти белгиланиши мумкин бўлган воқеани (ВИДЕО) таҳлил қилди.

"Менимча, бу эҳтиётсизлик ва пенальти эди. Ҳимоячи тўпни ҳужумчининг оёғи остидан чиқариб юборишга умид қилган бўлса керак. Бироқ ҳужумчи тўпни бироз ўнг томонга силжитди ва ҳимоячи унинг оёғига орқадан зарба берди".

Агар ҳакам ушбу "динамика"да пенальти белгиламаган бўлса, буни тушунаман. Секин-ҳаракатли такрорлашларсиз ва қўшимча ракурсларсиз, дастлаб икки ўйинчи бир-бирига параллел равишда югураётган ва уларнинг оёқлари тасодифан ўзаро туртилгандек кўринади. Бироқ кейин оёққа зарба ва қоидабузарлик борлигини кўряпмиз.

Оптимал қарор сариқ карточкасиз пенальти бўларди".

ЎзФҲМ расмий изоҳи эса қуйидагича:

"Бу Эрон ва Ўзбекистон ўйинидаги вазиятга ўхшаш. Ҳужумчи тўпни ён томонда қолдирмоқда ва оёғини ҳимоячи томонга қўймоқда. Бу вазият ўша заҳоти VAR'да кўриб чиқилган ва пенальти йўқ".

Эслатиб ўтамиз, ўша вазиятда Ричард Фрайдей Дилшод Саитов билан тўқнашиб майдонга йиқилган ва пенальти белгиланмаган эди.