Чилиликлар Перу ва Колумбия ўртасидаги баҳс натижаси борасида апелляция бермайди

Бу ҳақда Чили футбол федерацияси вице-президенти Андрес Фацио Молина маълум қилди.

Олдинроқ, Перу ва Колумбия терма жамоалари ўйин давомида дурангга келишиб олишгани эълон қилинганди. Бу натижа колумбияликларнинг тўғридан-тўғри ЖЧ-2018га чиқишини, перуликларни эса плей-офф учрашувларида иштирок этишини таъминлар эди. Чили терма жамоаси бу натижа туфайли ЖЧ-2018 йўлланмасидан қуруқ қолди. Колумбия терма жамоаси бош мураббийи Хосе Пекерман перуликлар билан баҳсда Радамель Фалькаога бошқа баҳслардаги натижаларни айтиб турган. Шундай сўнг, Фалькао рақиб жамоа футболчилари олдига келиб, оғзини қўли билан ёпиб, учрашувни шу ҳисоб билан (1:1) якунлаш кераклигини айтади.

Натижада Перу терма жамоаси сардори Хосе Паоло Герреро ўз жамоадошларини тинчланишга ва олдинга ўтмасликка чақиради ва ўйин 1:1 ҳисобида якунланади.

"Бу миш-миш. Перу ва Колумбияга қарши ҳеч қандай апелляция бўлмайди. Энди бу чилиликлар учун ёпилган саҳифадир" - дейди Молина.