“Бунёдкор” Ал-Ҳасада биринчи машғулотини ўтказди

“Ал-Фатҳ” клубининг уй аренаси – Шаҳзода Абдуллоҳ бин Жалави стадионидаги машғулот маҳаллий вақт билан соат 20:00да (Тошкентда 22:00 бўлади) бошланди. Унда Саудия Арабистонига олиб келинган барча 20 нафар футболчи иштирок этди. Миржалол Қосимов ўз шогирдлари билан майдонда роппа-роса бир соат давомида шуғулланди. Футболчиларнинг кайфияти жангавор ва барча соппа-соғ ҳолатда муҳим баҳсга ҳозирлик кўрмоқда.

Шаҳзода Абдуллоҳ бин Жалави стадиони ҳақида қисқача маълумот берадиган бўлсак, арена 1983 йили фойдаланишга топширилган. У ўз бағрига 27.500 мухлисни сиғдира олади. Стадионнинг ҳозирги ҳолати идеал даражада эмас. Айниқса, майдон ҳолатига ҳавас қилиб бўлмайди. Беш баллик тизимда 3 баҳога тортади.

Эслатиб ўтамиз, Осиё Чемпионлар лигаси 1-тури доирасидаги “Ал-Фатҳ” – “Бунёдкор” учрашуви Тошкент вақти билан соат 22:00да (Ал-Ҳасада 20:00 бўлади) бошланади.

Баҳодир МИРЗАЕВ
Ал-Ҳаса, Саудия Арабистони