Бугун футбол. "Динамо" - "Машъал"

"Динамо" мавсумни бир текис ўтказа олмаяпти. Самарқандликлар бир қарасанг сафарда "Нефтчи" мағлуб этиб келишади, бир қарасанг уйда "Қизилқум"га ютқазиб қўйишади. Бугун "Динамо" ўз майдонида еттинчи ўйинини ўтказади. Жамоа шу пайтгача ўзида икки бор ғалаба қозонган. "Динамо" Самарқандда "Шўртан" ва "Бухоро"ни мағлуб этган. 

Биласизми? "Динамо" ўз майдонида охирги уч учрашувдан бери ғалаба қозона олмаяпти. Жамоа икки бор дуранг ўйнаган бўлса, бир марта мағлубиятга учраган. 

"Машъал" ўйин томонлама яхши шаклланган жамоа, бироқ охирги пайтларда уларнинг ҳам омади келмаяпти. Муборакликлар охирги олтита ўйиннинг фақат биттасида ғалабага эришишди. "Машъал" ўз майдонида ҳозир ҳамма ютишга ўрганиб қолган "Обод"дан устун келди. Турнир жадвалининг 7-поғонасида бораётган "Машъал" ҳозирча сафарда атиги бир марта, "Шўртан" устидан ғалабага эришган. 

Биласизми? "Машъал" сафарда қаторасига беш ўйиндан бери зафар қуча олмаяпти: бир дуранг ва тўрт мағлубият. Хусусан жамоа охирги учта ўйинида гол ҳам ура олмади. "Сўғдиёна" - "Машъал" 3:0, "Насаф" - "Машъал" 1:0, "Қизилқум" - "Машъал" 2:0.