Бугун Эктор Купернинг туғилган куни

Салкам бир йил давомида бу мутахассис билан бирга ишлаб унинг кўплаб профессионал ва инсоний жиҳатларига тан бердим.

Купер ҳар доим футболчилар билан бир хил шароитда бўлишни истарди. Ўзи учун алоҳида имтиёз ва қулайликлар яратишни сўрамаган. Сафардаги ўйинларга учганимизда, ҳамиша самолётнинг эконом классида футболчилар билан бирга ўтирарди. Ҳеч қачон бизнесс классдан чипта олиб беришни талаб қилмаган (Хорижий мураббий у ёқда турсин, маҳаллий мураббийларимиз орасида ҳам сафардаги ўйинларга бизнес классда учмайдиган мураббийни билмайман).

Тошкентда ЎФА томонидан тақдим қилинган уйда бир ўзи яшар, хизматкордан воз кечганди. Барча уй ишларини ўзи қиларди. Уйда-ку майли, машғулотларда ҳам баъзан фишка ва накидкаларни ташиб юрганига гувоҳ бўлганман. Бундай ишларни бажаришдан ор қилмасди. Табиий қабул қиларди.

Терма жамоа делегациясидаги барча билан бирдек муносабатда бўларди. Бировнинг ишига аралашмас, ҳаммага хўжайинчилик қилишни ёқтирмасди. Осиё Кубогида матбуот анжуманига қайси футболчини олиб бориш ҳақида сўраганимда: "Сен матбуот котибисан. Буни ҳал қилиш сенинг ваколатингга киради. Исталган футболчини айтсанг, мен бирга олиб бораман", - деб айтганди.)

Бошқа миллат, бошқа диндаги одам бўлишига қарамай, ЎФА ва терма жамоада ишлайдиган инсонларнинг тўй ва маъракасига бориш учун албатта вақт топарди. Тўй бўлса, самимий табриклаб, аза пайтда кўнгил сўраб турарди. Ўзбекчасига айтганда, оқибатли инсон эди.

Feliz cumpleaños, Mister!

Ёқубжон Бобожоновнинг фейсбукдаги саҳифасидан олинди