Биз кутган “классико”

Олий лигамиз ҳам ўз даражасида шундай беллашувларга эга. Бошқа жамоалар билан қарама-қаршилик ҳар қанча кучаймасин, барибир “Пахтакор” ва “Нефтчи” ўртасидаги учрашувлар ишқибозлар томонидан ўзгача интиқлик билан кутилади.

Бир неча йилдан бери “Нефтчи” совринли ўринлар учун курашмай қўйгани туфайли олий лигадаги энг кескин тўқнашувларга эътибор юқори эмасди. Шунга қарамай, бу жамоалар учрашганда майдонга тушган футболчилар баҳс аҳамиятини ҳис қилиб, юқори савияда ва ҳужумкор футбол намойиш этиб беришга ҳаракат қилишади. 16 май, шанба куни 2015 йилги тўқнашувларнинг биринчиси “Пахтакор” стадионида ўтказилади. Фарғоналиклар 2007 йилдан бери биринчи марта ушбу тўқнашувга пешқадам сифатида ташриф буюришади. Бундай ҳолат анчадан буён содир бўлмаганди. Мавсум олдидан кимдир “Нефтчи”ни 9-турдаги мазкур ўйинга пешқадам сифатида ташриф буюришини айтганда уни телбага чиқариш мумкин эди. Лекин бу аниқ воқеликка айланди. Сафарда “Локомотив” ва “Бунёдкор” сингари етакчилардан очко олган Мурод Исмоилов шогирдлари энди “Пахтакор” синовидан ўтишади.



Ўйин арафасида ҳар икки жамоанинг ҳолатига батафсил тўхталиб ўтсак. “Пахтакор” мезбон ва “шерлар” фақат ғалабани кўзлаб майдонга тушишади. Жамоа Чемпионлар лигасида ўтказган кетма-кет баҳслардан сўнг энди ўзига келаётгандек. Тан олиш керак, мавсумни олий лигадан икки карра кўпроқ куч талаб қиладиган Чемпионлар лигаси учрашувлари билан бошлаш ҳеч кимга осон бўлмади. Унда қатнашган 4 клубимиз жисмоний жиҳатдан маълум бир даврда бошқалардан кўра кўпроқ юкламага дуч келишади. Самвел Бабаян жамоаси Бекободдаги беллашувда анча яхши ҳолатга кириб бораётганини намойиш қилди. Энди ашаддий рақиб билан ўтадиган беллашувда жамоа ишқибозларини хурсанд қилишга интилиши табиий. Таркибга Кахи Махарадзенинг қайтгани ярим ҳимояни кучайтирди. Жамшид Искандеров эса жароҳатдан фориғ бўлди ва машғулотларда қатнашишни бошлайди.

Унинг “Нефтчи” билан ўйинга тикланиши эҳтимоли қандайлигини билмаймиз. Дарҳол уни кескин ўтадиган беллашувда майдонга тушириш таваккал бўлиши мумкин. “Пахтакор”да бу йил ҳимояда муаммолар яққол кўзга ташланяпти. Тажрибали Камолиддин Тожиевнинг ўрни сезилиб турибди. Фарғоналиклар айнан ҳимоядаги камчиликлардан фойдаланишга уриниб кўришлари мумкин. Шунингдек, ҳужумларнинг ҳаддан ташқари қанотлар орқали уюштирилиши ҳам муаммога айланиб қолгандек эди. Бироқ “Металлург”га қарши учрашувда Самвел Бабаян Сергеевни чап қанот ярим ҳимоясига, Пардаевни ҳужумга тушириш орқали буни ҳал қилгандек бўлди.

Шу куни “Пахтакор” киритган ҳар икки тўп марказдан ташкил этилган ҳужумлардан кейин юзага келди. Агар “Нефтчи” ҳимояда зич ва кескинроқ ҳаракат қиладиган бўлса, бундан “шерлар”нинг қандай чиқиб кетишларини учрашувда кўриб оламиз.

“Нефтчи” айни пайтда руҳий жиҳатдан кўтарилиш палласида. Бундай вазиятда футболчиларга тегишли кўрсатмалари берилса кифоя, улар уни бажариш учун бор кучларини ишга солишади. Ўтган йили жамоанинг ўйинини танқид қилганлар кўп эди. Ростдан ҳам фақат натижа эмас, балки ўйин сифатининг ўзи кўнгилдагидек эмасди. Буни Мурод Исмоиловнинг ўзи ҳам тан олиб, жамоага 3-4 нафар яхши ижрочилар етишмаётгани тўғрисида тўхталганди. Мавсум олдидан Шукур Пўлатов, Мансур Саидов ва Бахтиёр Ёқубовни таркибга қайтарган мутахассис ўзи хоҳлаётган ўйин ташкил қилиш имкониятига эга бўлди. “Қўқон-1912”дан таклиф этилган Отабек Ҳайдаров ҳам ёмон таассурот қолдирмаяпти. Фарғона жамоасининг бу йилги трансферлари ҳар тарафлама фойдали бўлди.



Дарвозабон Евгений Черемисин зарур паллада муқаррар голлардан қутқариб қолганига гувоҳ бўлдик, Аббос Махситалиев ҳам энди ўз жойини топгандек. Албатта, “Нефтчи”да ҳам муаммолар етарлича топилади. Комбинацион ўйин кўрсатиш, кучли рақибларга қарши тўпни кўпроқ сақлаб туришда камчиликлар борлиги кўриниб турибди. Шундай бўлса-да, жамоа қайд этаётган натижалар ҳозирнинг ўзида ижобий деб айтиш мумкин. Олий лигада ҳар бир беллашувга жиддий тайёргарлик кўриш орқали барча рақибни доғда қолдирса бўлади. Бунинг учун шунга яраша меҳнат қилиш керак холос. Рақиб услубига қараб тактика ва ўйин услуби танлаш, футболчилар позициясини ўзгартириш, учрашув мобайнида бир услубдан бошқасига ўта олиш қобилияти, рақибнинг устун тарафларини олдиндан кўриб, унга қарши чора қўллаш орқали буни уддалаш мумкин. Бир ҳафтада бир ўйинда майдонга тушиш талаб этилганда бемалол совринли поғоналар учун курашиш имконияти мавжуд.

Ушбу жамоалар олий лига, Ўзбекистон Кубоги ва “Пахтакор-79” хотирасига бағишлаб ўтказилган мусобақада ҳам ўзаро тўқнаш келишган. Мурод Исмоилов ўзи бошқарган ва мураббийлик фаолиятини бошлаган жамоага қарши беллашувда нималарга қодир эканлигини намойиш қилишни янада кўпроқ исташи табиий. Ҳар икки жамоа сафида бу тўқнашув нима эканлигини яхши тушунадиган футболчилар етарли. Кримец, Козак, Махарадзе, Сергеев, Ҳошимов, Каримов, Соҳибов, Исматуллаев, Пўлатов, Эрматов, Саидов, Ёқубов, Ҳакимов сингари ўйинчилар ёшлигидан бундай ўйинлар мақоми, аҳамияти ва шиддатини билиб, катта футболга кириб келишган. Шундай экан, бизни кескин ҳамда қизиқарли ўтиши кутилаётган ажойиб футбол кутиб турганига шубҳа йўқ.

Ҳозиргача олий лигада “Пахтакор” ва “Нефтчи” 46 марта майдонга тушган. Эътиборли тарафи шундаки, миллий чемпионатлар тарихида ҳар икки жамоа рақибидан бошқа клубларга қараганда кўпроқ очко тортиб олган. “Пахтакор” “Нефтчи”ни, “Нефтчи” эса “Пахтакор”ни юртимиздаги бошқа жамоаларга нисбатан кўпроқ мағлубиятга учратган. Ҳозирча пойтахтликлар 22, фарғоналиклар 17 ғалабага эга. 7 беллашувдагина дуранг натижа қайд этилган холос.
Шанба куни бўлиб ўтадиган учрашув бизни яна аввалги ўйинларга қайтараётгандек. Ҳар икки жамоа пешқадамлар сафида, “Пахтакор” ғалаба қозонса, йўқотилган очколар камлиги бўйича пешқадамлардан бири мақомини сақлаб қолади, “Нефтчи” ютган тақдирда биринчи ўринда юришни давом эттиради. Умид қиламизки, нафақат бу клублар ишқибозлари, балки бошқа жамоалар мухлислари ҳам ўйинни кузатиш учун “Пахтакор” стадионига ташриф буюришади. Тарихдаги кескин “классико”лардан қолишмайдиган учрашувни кузатишдан барчамиз умидвор бўлиб қоламиз.

Беҳзод НАЗАРОВ.