Биродар Абдураимов: "Ҳал қилувчи ўйинларда кўп нарса мураббийга боғлиқ бўлиб қолади"

ЖЧ-2018 саралаш босқичида аввалига Хитойда тўп тепсак, кейин ўз майдонимизда Жанубий Кореяни қабул қиламиз. Эндиликда бор эътиборимиз мана шу баҳсларга қаратилади. Таниқли футбол фахрийси Биродар Абдураимов "Футбол Экспресс" газетасига берган интервьюсида Хитойга қарши учрашув олдидан ўз фикрлари билан ўртоқлашди. 

- Албатта, бутун халқимиз терма жамоадан фақат ғалаба кутяпти, - дейди Биродар Ҳасанович. - Саралаш ўйинларининг охирги босқичида кўп нарса мураббийларга боғлиқ бўлиб қолади. Шунинг учун Хитой билан ўйинда иккала мураббийлар ўртасида кураш кечади. Менимча, айнан мураббийларнинг топқирлиги ва билими кўп нарсани ҳал қилади. Ҳозир жамоамизни танқид қилмасдан уларга фақат омад тилаш керак. Агар терма жамоамиз Хитойдан ғалаба билан қайтса, бу Мустақиллик байрами учун юртдошларимизга ажойиб совға бўлади. 

Хитой жиддий рақибми? 

- Мен уларнинг бир-иккита ўйинини кўрганман. Хитой - жиддий рақиб. Уларнинг футболчиларида юқори техника йўқ, аммо ҳаракатчан. Тезкор ва меҳнаткаш. Бундан ташқари, уларнинг мураббийи Марчелло Липппига ҳам алоҳида эътибор қаратиш керак. У бундай муҳим паллада футболчиларга тегишли кўрсатмаларни беришга қодир. Яширмайман, мен айнан Липпидан хавотирдаман. Аммо Хитой билан бемалол ўйнаса бўлади.