Биринчи лига, “Ғарб” минтақаси. Апрель ойининг энг яхши футболчиси – Низом Норов!

1-ўринга узоқ ўйланишлардан сўнг Низом Норовни қўйдик. Бу йил “Хоразм” шарафини ҳимоя қилаётган ҳужумчи жамоаси билан бирга ортда қолган ой давомида ижобий    натижалар қайд этди. Норовга тўхталадиган бўлсак, термизлик футболчи апрелда бўлиб ўтган 6та ўйинда рақиблар дарвозасига 4 бор йўл топа олгани билан эътиборни тортди. Аҳамиятлиси Низом гол урган ўйинларда “Хоразм” мағлуб бўлмаган. Ўтган мавсумда ҳам бу ҳужумчи “Чуст-Пахтакор”да ўйнаб тўпурарлар қаторидан жой олганди. Бу йил “Хоразм” мураббийларининг ундан умиди катта.

2-ўринга Наврўзбек Ҳаипов муносиб кўрилди. “Орол”нинг ишонган ҳужумчиларидан бири бўлмиш Ҳаипов апрель ойи давомида жамоаси учун 3 бор фойдали голлар уришга эришди. Умуман айтганда Нукус жамоаси ҳам ўтган ойда яхши натижалар қайд этди. 24 ёшли футболчи эса мазмунли ўйинлари натижасида мухлислар олқишига сазовор бўлди.

3-ўринга Элдор Тожибоевни киритдик. Ўйлаймизки ушбу танловимиз билан янглишмадик. Сабаби шу кунгача “Шўртан”нинг барча учрашувларида ўйнаб келаётган дарвозабон апрель ойида атига бир бор ўз дарвозасидан тўп олиб чиқишга мажбур бўлди. Ғузорликларнинг чемпионатда мағлубиятга учрамай келаётганига айнан Тожибоевнинг ҳам ҳиссаси катта бўлмоқда дейиш мумкин.
   
“Ғарб” минтақаси. Апрель ойининг энг яхши футболчиси!   
1. Низом Норов – “Хоразм”
2. Наврўзбек Ҳаипов – “Орол”
3. Элдор Тожибоев – “Шўртан”