"Бэйл лойиҳаси" ўзини оқладими?

Гап Бейл борасида кетганда нега ҳамма ёлғон гапиради? 

Моуриньо Европа Суперкубоги учун ўйиндан аввал: “Агар Бэйл “Реал”га керак бўлмаса, уни сафимизга қўшиб олиш учун барча ишни қиламиз” - деганди.
Ҳа, Бейл майдонга тушди аммо шу куни у бош қахрамон эмасди. Учрашувдан кейин эса жаноб Моуриньо: “Бэйл Зиданга керак экан ва ўзи ҳам Мадридда қолмоқчи. МЮ учун ўйин бошланмай, тугади” деди. Наҳотки сиз Жозе фикрини шунчалик тез ўзгартиришига ва мақсадидан осонгина воз кечишига ишонсангиз? Нега унда португалиялик шунча гапдан кейин ҳам раҳбарлардан ярим ҳимоячи трансфери учун 100 миллион сўради? Бу Моуриньога хос бўлган айёрлик!

Гаретнинг агенти ҳам яхшигина иккиюзламачи. Баҳорда Жонатан Барнетт мижози Бэйл ҳеч қаерга кетмайди деб қайта-қайта интервью берди, аммо Зиданнинг 1-2та интервьюсидан кейин – Зинедин ўта хотиржамлик билан, трансфер ҳақидаги миш-мишлар кулгили эканлигини ва уларга ортиқча тўхталмаслигини айтди. Аммо аслида аввал ниманидир ишонч билан таъкидлаб гапириб қўйиб, кейин у хато бўлиб чиққан иштирокчи кулгига қолади. Бу орада “Перес дода” ҳам 1-2 марта “Бэйл – дунёнинг энг яхши футболчиларидан бири. У бизга керак, биз уни сотмоқчи эмасмиз” деб қўйдилар.

Аммо “Барселона” раҳбарлари ҳам шундай куй чалишаётганди– Неймар жамоада қолади, бу муҳокама қилинмайди ва 200 % ишонч билан айта оламиз. ПСЖ пулларини бошқа истаганига сарфласин… Амалдачи?

Агент Барнетт, мураббий Моуриньо ва президент Перес – ҳар бири пихини ёрган мутахассис. Бироқ уларнинг ҳаммаси била туриб ёлғон интервьюлар беришдан чарчамаяпти. Чунки “Реал” нишонга олган 2-3 футболчилардан биттаси Мадридга яқинлашса ҳам, Флорентино –Манчестерга қўнғироқ қилиши ва уларга Бэйлни таклиф қилишини тушуниб туришибди. Лекин Зинедин, доим аниқ жавобдан қочган, бу воқеага ўзи истамаган ҳолда қўшилиб қолган қахрамон. У алдагиси келмади, шунинг учун ҳам саволни аниқ бир жавобсиз қолдириб кетаверди.

Бироқ Перес ва Моуриньо ўзга олам. Бу ишни улар қойиллатиб бажариб беришади. Уэльсликнинг агенти ҳам у даражада соддадил эмас, айнан у Бэйлнинг жамоадаги тутган ўрнидан норози бўлиб мураббий Анчелоттига эмас, президент Пересга арз қилганди. Бу ҳақида Карло ота ўзининг китобида қуйидагича фикр билдирган: "Мураббийнинг олдига келиб, ўз фикрини айтишга Гаретнинг журати етмади. Менимча, гап унинг характери кучсизлигида!"

Хулоса. Воқеанинг деярли барча иштирокчилари мунтазам равишда ёлғон қўшиб гапирадилар, чунки “Реал” ва “Манчестер Юнайтед” ўртасида доимо музокаралар, олди-берди бўлиб келган. Бу фақатгина Хамес ёки Бэйл билан чекланиб қолмаслигини ўзингиз ҳам яхши биласиз. Инглизлар доимо узоқни кўзлашга ҳаракат қилишади ва айнан шу сабаб Неймарни 222 миллион еврога олишни исташмади ва энди Гарет трансферини ўрганиб чиқишмоқда.

“Реал”эса чиройли саҳна кўринишини юзага келтирган. Ҳуддики Зиданнинг режаларида Бэйл бош ролни ўйнаётгандек. Буларнинг ҳаммаси, футболчининг нархини ошириш учун қилинмоқда. Менимча, албатта бу шахсий фикр, Перес Мората ва айнан Бэйлни сотиб, ўша пулга ёш иқтидор Мбаппени Мадридга олиб келмоқчи бўлган. Биласизми нега бундай деяпман? Бўлган барча ишни бир томонга суриб туринг, айнан ўша Флорентино Перес “Лион” президенти билан суҳбат чоғи – “Килиан деярли қўлимизда, иш деярли битди” деганидан хабарингиз борми? Президент Переснинг фикри фақатгина “Монако” рад жавобини бергандан кейингина “ўзгариб” қолди.

Нега Гаретнинг ишлари юришмаяпти?

Мессининг соясидан чиқиш,Роналдунинг соясидан чиқишдан осонроқ – Криштианунинг бўйиаргентиналикникидан баландроқ. Албатта бу хазил. Лекин чиндан ҳам Бэйлга осон эмас. Сабаби у на ўнгга ва на чапга ортиқча қадам ташлай олмайди. Бунинг учун ё эркин ижодкор бўлиш, ёки марказда ўйнаш зарур. “Реал” схемаси шундай тузилганки у ерда Гарет ҳеч қанақасига марказда бўлмайди. Ҳужумнинг олдинги чизиғида Роналду билан дуэтда ҳаракат қилишига эса, Бенземанинг барибир асосий таркибда бўлиши ва французнинг Роналду билан бир-бирини яхшироқ тушуниб ҳаракат қилиши ҳалақит қилади.

“Тоттенхэм” сафидаги Гаретни бир эсланг – замонавий футболнинг энг тез футболчиси, АПЛнинг ўша вақтдаги энг яхши ёш футболчиси. Ана майли ўтган йилги Евро-2016да Уэльс термасидаги Бэйлни ёдга олинг. Тўғри унга Рэмси ва қолганлар кўмаклашишиди, аммо тажрибаси эвазига жамоасини тарихий натижага етаклаган айнан Гарет бўлмадими? Энди “Реал”даги манзарани кўз олдингизга келтиринг: чап қанот ҳужуми Роналдога тегишли, ва агар “замбарак” ҳужумнинг олдинги чизиғига ўтса ҳам, Бэйл “массовка”чи бўлиб қолаверади. Бошқалардан фарқи у шунчаки қиммат ва сифатлироқ. Ахир у неча йилдан бери “Реал”да ўзини “бахтиёр” кўрсатиш билан банд-ку!

Бэйл ташқи томонлама ҳам “Реал”нинг юзи бўлишга тўғри келмайди. Замонавий “Мадрид”да бунга қандай эътибор беришлари, қанчадан-қанча футболчилар фақатгина қора танли бўлганликлари учун сотиб олинмаганини клубга бефарқ бўлмаганлар яхши билади. Охирги вақтларда Марсело қахрамонлик кўрсатаётгани, Рамос сўнги дақиқаларда гол уриб, ғала келтираётгани, ана борингки Каземиро кучли зарба билан муҳим гол ураётганини тасаввур қилиш, шу ишни Бэйл қилаётганини кўз олдига келтиришдан анча осон бўлиб қолди. Шундай эмасми?! Авваллари ҳа, Гарет бу ишни қила оларди, аммо ҳозир – эсидан чиқиб қолди. Гарет шунчаки “Реал” аталмиш бу дунёнинг вакили эмас.

У АПЛда кучли эди, “Мадрид” модаси унга тўғри келмади.Бу вазиятда ким ростини, чин дилдан гапираётганини тушуниш қийин. Аммо Уэльс афсонаси Гиггзнинг яқинда айтган гапларига эътибор беринг: “Бэйл бу ёзда МЮга ўтади деб ўйламайман. Аммо вақти келиб, сиз ва биз бунинг гувоҳи бўламиз”. Бироқ ҳамма гап ҳам шунда-да. Моуриньонинг иккинчи мавсумидан аввал “қизил иблислар” қайиғидан алоҳида жойга эга бўларди Бэйл. Кейинроқ, Бэйл ўттизга тўлганда, ҳозир у 28 ёшда, фаолиятида бурилиш қилишга кеч бўлмасмикин?

Хулоса. Жамоада Роналдо бор экан, Бэйл “Реал”нинг биринчи рақамли юлдузи бўла олмайди. Ва гап фақатгина Криштиануда ёки жароҳатларда ҳам эмас.

Мадрид бошқача ўйнайди. У ерда “сиёсат” бошқача! Гарет – ажойиб спортчи, лекин у “Реал” ўйинини бошқаришига ҳеч қачон имкон беришмайди.

Бэйл асосий таркиб футболчиси бўла оладими?

Агар Зиданга футбол тарихидаги энг қиммат футболчилардан бири заҳирада ўтириш учун керак бўлса, бу кимсан Перес жаноблари учун ҳам қимматлик қилади. «4-4-2» ўйин схемасига Бэйлдан кўра, Асенсио ва Иско кўпроқ мос тушади. Бензема ҳеч қаёққа кетмоқчи эмас, Ковачични А Сериядагилар сотиб ололмади (ёки олмади). Бэйл асосий таркибда ўйнашига ким кафолат бера олади?

Зиданга унинг ўйини мақул, аммо ўнг қанот вакили сифатида, ҳужумнинг шунчаки бир вакили! Ундан ортиқ эмас. Вазиятга четдан назар ташлайдиган бўлсак жамоада ўзига жой топа олмай ижарага (ҳозирча) кетган Хамес Родригес ҳам қахрамонимиздан кўпроқ нарсага эришди. Тўғри Бэйл жуда муҳим голлар урган – шубҳасиз, аммо улар ўтмишда қолди. Давоми кўринмаяпти...

Бугунги “Реал”да Гарет Бэйлдан муҳимроқ футболчилар етарли. Марсело, Рамос, Карвахаль, Кроос, Модрич ва Каземиро. Эътибор бердингиз-а, Роналдони санамаганда шунча футболчи. Энди жавоб берингчи, Гарет Бэйл бу рўйхатда нечинчи ўринда бўлади? Ким нима деса десину, кучли бешликда эмаслиги аниқ.

Хулоса. Асосий таркибнинг алмаштириб бўлмас аъзоси бўлиш учун Бэйл қўққисдан Роналдо билан идеал тандем хосил қилиши, ёки Искони захира ўриндиғига ўтқазиб қўйиши зарур.

“Манчестер Юнайтед”га ўтиш Гаретга керакми?

Агар Бэйл, Роналду кетмасликка қарор қилгани, ёки Неймар Манчестерга эмас, Парижга йўл олганидек, ўз тақдирини ўзи ўзгартирмаса – Иско асосий таркибдаги ўрнини олиб қўйган футболчи бўлиб, жимгина ўтиришга рози дегани бўлади.

Агар вингерга бошқаларнинг меҳнати эвазига тўпланган совринлар рўйхати эмас, майдонда ўйнаш муҳимроқ бўлса, унинг ўзидан бир садо чиқишини кутамиз.

Энг қизиғи, янги мавсумда Бэйл яна голлар уриб, асосий фигуралардан бирига айланса ҳам, Рамос, Марсело, Кроос ва Модрич бор “гуруҳнинг тўдабоши” бўлолмайди. Бир нечата гол ва голли узатмалар – унинг қўлидан бундан кўпроқ нарса келади.

Ҳа, 2017 йил ёзига келиб, “Реал”дан МЮга ўтиш – ортга қадамдек туюлар, аммо захира ўриндиғида ўтириб қолгандан, ажойиб шаҳар Манчестерда – етакчилардан бири бўлган мақул чамамда. Бэйлнинг маҳоратига, унинг машҳурлиги ва чиндан катта пулларга арзийдиган футболчи эканлигига шубҳа йўқ. Шунчаки унинг характерига шубҳа бор. Гарет футбол тарихида энг яхшилардан бири бўлмоқчими, ёки тарихда захирада ўтирган энг қиммат футболчи бўлиб қолмоқчими?

Мадридда қолиб Бэйл нимага эришади? Омадли мавсум ҳам олдинга ташланган қадам бўлишига кафолат йўқ. Ла Лига, Чемпионлар Лигаси ва Суперкубокни ютар? Бу яхши, аммо футболшчи сифатида ўсишчи?

Хулоса. МЮ нисбатан ёшроқ, арзонроқ, камроқ жароҳат оладиган футболчи олиши мумкин. Бунга инглиз клубида вариантлар етарли, аммо “қизил иблислар”га кучли вингер керак. Худди шундай Бэйл ҳам фаолиятига янгилик киритиши зарур. Афсус, лекин ушбу трансфер амалга ошмай қоладиганга ўхшайди. Сабаби, йилдан йилга уэльсликда “Реал” етакчиси бўлиш имкони пасайиб бораверади.

Гаретнинг агенти, Перес ва бошқаларфутболчи Мадридда бахтли эканлигини такрор ва такрор айтишмоқда. Бэйл ҳам “Реал”га кераклигига ўзини-ўзи ишонтириш билан оввора.

Аслидачи, чиндан ҳам Бэйл бахтлими? Агар ундай бўлмаса, кетишга унда жасорат етармикин?

Омонжон Тўхтамирзаев