"Барселона"га нима бўлди? Месси ҳали ҳам шартномани узайтирмади

"Барса"га нима бўлди?

Жозеп Бартомеу бошлиқ “Барселона” раҳбарияти F1 машиналари тезлигида атрофидаги барчанинг ишончини йўқотмоқда. Ҳозир хаттоки клуб етакчилари ҳам асабий ҳолатга тушиб қолган. Cadena SER радиостанцияси хабарига кўра, жамоа аъзолари “Барселона” трансфер бозорида етарлича фаол эмаслигидан норози. Бошқа бир испан нашри “Marca”нинг таъкидлашича, жамоа етакчиси Лионель Месси ҳам шу сабаб янги шартномага имзо қўйишга шошилмаяпти экан. Ваҳоланки, шартнома шартлари, футболчининг ойлиги, бонус пуллари ва қолган деталлар келишиб бўлинганди. Аргентиналик ўзини узоқ муддатли (2021 йилгача) шартнома билан каталония клубига “боғлаб” қўйишдан аввал, атрофида ўзини қандай жамоа бўлишини тушуниб олмоқчи. Табиийки, вазиятни Неймарнинг “ПСЖ”га ўтиб кетиши кескин ёмонлаштирди.

Доимо “Реал”ни мазаҳ қилувчи ва жамоасини устун қўювчи Жерар Пике ҳам бугунги кунда “Реал” рақиби “Барселона”дан кучлироқ эканлигини тан олди.
Андрес Иньеста эса, эслатиб ўтамиз, унинг шартномаси ҳам яқинда ўз якунига етади, шу кунларда ғалати интервью берди: “Хўш, айтайлик, мен аввал ортиқча ўйлаб ўтирмаганим, келажагим ҳақида бош қотиряпман” - деди ярим ҳимоячи.

Бу футболчилар жамоанинг шунчаки аъзоларигина эмас, балки майдонда ҳам, кийиниш хонасида ҳам ҳақиқий етакчилари саналишади.

Трансферлар масаласида қандай муаммо мавжуд?

“Реал” ортиқча овоза қилмай, усталик билан таркибини ёш ва нисбатан қиммат бўлмаган иқтидорли футболчилар билан тўлдириб боряпти. “Атлетико”дан Тео Эрнандес, ёшлар ўртасидаги Европа Чемпионати “энг яхши футболчиси” Дани Себальос сафга қўшилишди. Каталонияликлар эса ҳа деганда бозорда ўз мақсадларига ета олмаяптилар. Шу ёзнинг ўзида жамоа 87 миллион евро сарфлаб улгурди – Паулиньо, Нелсон Семеду, Деулофеу ва Марлон, – лекин уларнинг орасида Неймарнинг ўрнини боса оладиган футболчи кўринмаяпти.

“Барселона”нинг 2016-2017 йилги мавсумдан буён амалга оширган “омадли” трасферлари
Паулиньо (40 миллион), Андре Гомеш (35 миллион), Арда Туран (34 миллион), Нельсон Семеду (30,5 миллион), Пако Алкасер (30 миллион), Самуэль Юмтити (25 миллион), Алекс Видаль (17 миллион), Люка Динь (16,5 миллион), Яспер Силлессен (13 миллион), Херар Деулофеу (12 миллион), Марлон (5 миллион), Денис Суарес (3,25 миллион). 

Албатта, Бартомеу вазиятни ўнглашга астойдил уринмоқда, бироқ барча ҳаракатлар бефойда бўлмоқда. “Ливерпуль” Филиппе Коутиньони 130 миллион фунтга сотгиси келмаяпти (охирги таклифимиз қабилидаги “қўрқитиш” ҳам иш бермади), дортмунднинг “Боруссия”си жамоа машғулотларида қатнашмаётган Усман Дембелени ҳам қўйвормаяпти, “ПСЖ” хаттоки жамоанинг янги тактикаси, ўйин услубига унчалик мос тушмаётган Анхель Ди Марияни ҳам арзон гаровга бериб юбориш ниятида эмас. Бунга аргентиналик ярим ҳимоячининг ёши хазиллашиб юриб, 30га бориб қолгани ҳам халал бермаяпти. “Барселона” жуда катта миқдорда пул таклиф қилсада, ҳеч ким билан тил топиша олмаяпти. Испанияда ҳам мавсум бошланди, аммо Неймар сотувидан тушган 222 миллион, қайсидир банк ҳисоб рақамларида “чанг босиб” ётибди.

Паулиньо трасфери алоҳида бир мавзу. Биринчидан, “Барселона” музокараларда яна омадсизликка учради ва вазиятни ўзи томонга оғдира олмади. Натижада шартномада ёзилган товон пули - 40 миллион евро (ундан 7 миллионини футболчи ўзи тўлади)ни бир тийин ҳам қолдирмай хитой клубига тўлаб берилди. Иккинчидан, бу трансфердан сўнг, каталония клуби президентини коррупцияда айблай бошлашди. Эмишки, Паулиньонинг трансфери, катта бизнеснинг ўйинининг бир қисми бўлиб, эвазига “Эвергранд” компаниясига “қўйилган пахта” экан. Эвазига хитойликлар Бартомеунинг шахсий компанияси учун зарур бўлган Хитой портлари биридаги ишни ҳал қилиб бераркан. Табиийки, “Барса” бу хабарларни инкор этди. Ва буларнинг барчаси Бартомеуга қарши уюштирилган ва пухта ўйланган информацион ҳужум эканлигини қўшимча қилди.
“Барселона” хўжайинига босим тобора кучайибю бормоқда. Мисол учун аввалги чоршанба куни каталониянинг RAC1 радиостанцияси журналисти Жерар Ромеро, клуб “Ницца” ярим ҳимоячиси Сери вариантини фақатгина у ҳақида ижтимоий тармоқларда мухлис ва мутахассислар ёзганидан сўнггина ўрганишни бошлаганини айтиб ўтди. Куни-кеча Чемпионлар Лигаси саралашида “Наполи”га қарши жавоб ўйинида ивуарликнинг ҳаракатларини бевосита кузатгандан сўнг, “Барселона” барчаси келишиб қўйилган бўлсада, ўйиндан чиқишга ва футболчини харид қилмасликка қарор қилди.

Бевосита Лео Месси шартномасига келсак...

Амалдаги келишув 2018 йил ёзига қадар амал қилади ва назарий жиҳатдан, агар аргентиналик жамоасини ўзгартириш ниятида бўлса, январ ойидаёқ истаган клуби билан шартномага имзо чекиши мумкин.

Лекин вазиятнинг бошқа бир нозик жиҳати мавжуд. Июль ойи бошларидаёқ “Барселона” ва Месси 2021 йилнинг 30 июнига қадар белгиланган янги шартноманинг барча томонларини келишиб олишган ва клуб расмий сайти яқин ҳафталарда, Месси мавсумолди тайёргарликка қайтганида барча хужжатлар имзоланади деб ёзилганди.

Месси қайтди, мавсумолди мусобақалар тарихда қолиб кетди, Испания чемпионати ҳам бошланишга улгурди, бир ярим ой вақт ўтди – аммо имзоланган шартнома ҳали ҳам йўқ.

“Marca”нинг маълумотларини инобатга оладиган бўлсак, “Барселона” сардори трансферларни кутяпти.

Сизда қандай билмадиму, аммо шахсан мен, Месси шартномасини узайтириши ҳақида хаддан зиёд кўп ўқийман. Наҳотки, бу шунчалик тез-тез содир бўлса?

“Барселона”нинг асосий жамоасидаги 13 йил давомида Лео жами 8та шартномага имзо қўйган. Энг қизиғи, уларнинг 6таси 2009 йилгача амалга оширилган. Фаолияти бошида аргентиналик вундеркинд шунчалик тез ўсиб борганки, баъзан унга ярим йилнинг ўзида икки марталаб янги шартнома таклиф қилинган ва келишув муддати узайтираверилган.

Энди ҳозир юзага келган вазиятга келсак, унинг ўзига хослиги шундаки, Месси билан клуб ўртасидаги шартнома тугашига биринчи бор бир йилгина вақт қолди. Музокаралар ҳеч қачон бунчалик чўзилмаган ва қийин кечмаганди.

Ўзининг охирги шартномаси (ҳозирча охиргиси, жамоа мухлислари хафа бўлишмасин)ни Лионель 2014 йилда имзолаганди. Унга кўра футболчи йилига 36 миллион евро атрофида маош олади, товон пули – 300 миллион евро.

Наҳотки, Месси “Барса”дан кетиб қолса?

Неймарнинг 222 миллион еврога сотиб олинганини ҳисобга олсак, Мессининг 300 миллионга трансфер қилиниши иложи йўқ ишдек кўринмаяпти.

Бироқ, ҳозир у учун 300 “лимон” санайдиган “аҳмоқ” топилмаса керак. Хаттоки “Ман Сити”нинг ўша пули кўп хўжайинлари ҳам. Нега “аҳмоқ” дедим биласизми, сабаби футболчининг амалдаги шартномаси яна бир йилдан кейин тугайди! Бу катта футболда муҳим роль ўйнадиган жиҳат.

Тони Кроос воқеаси кўпчиликнинг ёдида бўлса ажаб эмас. Амалдаги Жаҳон чемпионини фақатгина шартнома муддати тугаб бораётгани ва томонлар уни узайтириш учун тил топиша олмагани сабаб “Бавария” ҳеч бўлмаса 30 миллионлик бўлиб қолай деганди.

Гвардиола ва Месси бир-бирини яхши тушуниши ва илиқ хотиралар билан эслаши аниқ. Лекин бу 300 миллионни бериб юборавериш учун етарли эмасдек. Шу сабабли, назаримда “Манчестер Сити” ҳам  январ ойини кутгани мақсадга мувофиқ.

Шу ўринда Лионель Мессининг ўзи ҳам анчагина хазилкашлигини эътироф этиш зарур. Йилда бир-икки марта уни сотиб олиши мумкинлиги айтилаётган клуб пайдо бўлганда Лео ўзини ва жамоатчиликни зериктирмасликка ҳаракат қилади. “Сити” ва “Челси” вариантлари пайдо бўлганда, футболчи жамоаларнинг инстаграмдаги саҳифаларига аъзо бўлиб қўяди. Лекин иш ўша ижтимоий тармоқлардаги “лайк”лардан уёғига ўтмай келаяпти. Буёғига вазият қандай тус олишини вақт кўрсатади.

Омонжон Тўхтамирзаев