"Барселона" амалга оширган энг ғалати 5 трансфер

Бир вақтлар "Барса" ўз таркибига Ромарио, Роналдо, Роналдиньо ёки Дембеле, Коутиньо каби футболчиларни трансфер қилишга эришди.

Бироқ "Барселона"да ҳам ғалати трансферлар бўлиб турган.

5. РЮШТЮ РЕЧБЕР

Туркиялик голкипер 2000 йилларнинг бошларида юлдузлик онларини ўтказди. 2002 йилда эса термасининг ЖЧда кўрсатган "ҳунарлари"да у асосий инсонлардан бири бўлганди. Ўшанда жамоа мундиалнинг ярим финалига етиб боришни уддалаганди.

"Фенербахче"да яхши мавсумни ўтказганидан кейин 2003 йилда у Европанинг энг катта жамоаларидан бири "Барселона"га ўтди.

Албатта, бу трансфер ғалати кўринди. Мавсум бошланиши арафасида эса посбон жароҳат олди. Бироқ у тезда ўзига келиб олган бўлса-да, Франк Райкаард уни ўйинларга туширавермади. Бунинг сабаби сифатида посбоннинг испан тилини яхши билмаслиги деб келтирилди.

Албатта, Райкаард футболчини трансфер қилишдан олдин унинг барча жиҳатларини билиши керак эди, бироқ бундай бўлиб чиқмади. Речбер ОАВда ўйинларга чанқоқлигини ва ўзига мунтазам амалиёти кераклигини айтган бўлса-да, Райкаард Вальдесни майдонга ташлайверди.

Рюштю "Барса" таркибида умумий 7 ўйинда қатнашди ва яна собиқ жамоасига қайтиб кетди. У "Барселона"га кераксиз футболчи бўлганлиги учун ушбу рўйхатдан ўрин олди.

4. АЛЕКСАНДР ГЛЕБ

2008 йилнинг ёзида "Барселона" "Арсенал" сафида яхши ўйин кўрсатаётганларни ўз сафига қўшиб олаверди.

Шимолий Лондонда ажойиб ҳаракат қилган Марк Овермарс, Эммануэль Пети ва Тьерри Анри 2000 йилларнинг ўрталарида "Арсенал"дан "Камп Ноу"га кўчиб ўтди. 2008 йилда Каталония гранди "Арсенал"нинг белоруссиялик ярим ҳимоячиси Александр Глебни трансфер қилди.

Глеб "Арсенал"да уч мавсум давомида кўплаб учрашувларда майдонга тушди ва "канонирлар" мухлислари орасида ўз мавқесига эга бўлди. Бироқ у "Барселона"га керакмиди?

"Арсенал"да Робин ван Перси, Эммануэль Адебайор, Томас Росицки ва Сеск Фабрегас каби футболчилар турганида "Барселона" айнан уни танлагани ғалати ҳол бўлганди ўшанда.

Хуллас, унинг "Барселона"га ўтиши омадсиз чиқди. У 2008/09 йилги мавсумда "Барселона" таркибида 19 учрашувда майдонга тушди ва фақатгина бир гол киритди.

"Барселона" Глебни "Штутгарт", "Бирмингем", "Вольфсбург" каби жамоаларга ижарага берди. Шартномаси якунланганидан кейин Россиянинг "Крилья Советов" жамоаси таркибига бориб қўшилди.

Кейинчалик "Барселона" "Арсенал"нинг яна бир футболчиси билан шартнома имзолади. У Сеск Фабрегас эди!

3. ДИМИТРИЙ ЧИГРИНСКИЙ

2009 йилда "Барселона" марказий ҳимоячилар "ови"га чиқди. Жамоа 2008/09 йилги ЕЧЛда "Шахтёр"ҳимоячиси Димитрий Чигринскийнинг ўйинларини кузатди.

Унинг "Шахтёр" билан УЕФА суперкубогида ажойиб ўйин кўрсатгани учун "Камп Ноу" эгаси таркибидаги илк украиналик футболчига айланди. У 25 млн евро эвазига трансфер қилинди.

Дебют мавсумида у "Барса" билан еврокубокларда ўйнай олмади. Сабаби у "Шахтёр" билан майдонга тушиб бўлганди.

Димитрий "Барселона"нинг асосий футболчисига айланмади. Сабаби ўша вақтларда марказий ҳимояда Пуйоль-Пике тандеми ҳосил бўлганди.

Димитрийни жамоага Пеп Гвардиола олиб борганди. Ҳимоячи "Барса"даги илк мавсумида 12 учрашувда қатнашди ва шундан кейин яна "Шахтёр"га қайтиб кетди. Гвардиола унинг қолишини истаган бўлса-да, футболчи доимий ўйин амалиётини истади.

2. АЛЕКС СОНГ

2012 йилда "Барселона" ҳимояга ёрдам берадиган ярим ҳимоячиларни излаб юрганида "Атлетик" таркибидаги Хави Мартинезни мўлжалга олганди.

Бироқ уни "Бавария" "илиб кетганидан" кейин "Барселона" "Арсенал" футболчиси Алекс Сонгга эътибор қаратди.

Камерунлик футболчи "Арсенал"да 7 мавсумни ўтказганди. 2006 йилда у жамоа таркибига бориб қўшилган бўлса-да, 2008/09 йилги мавсумда жамоанинг асосий таркибига кира бошлади. У Сеск Фабрегас билан биргаликда ярим ҳимояда тандем ҳосил қилди. Шу сабабли "канонирлар"нинг ҳужумлари анча кўпайди.

2011 йилда Сеск "Барселона" сафига ўтиб кетди. Ўша мавсумда у 46 учрашувда майдонга тушди ва 12 голга ассистентлик қилди. Бироқ у "Барселона" таркибида ўзини кўрсата олмади.

1. КЕЙРРИСОН

Рюштю, Глеб, Чигринский ва Сонг "Барселона" таркибида ўйинларда майдонга тушишган. Бироқ Кейррисонга бу насиб этмаган.

Шу боисдан у "Барселона" учун умуман кераксиз трансферлардан бири бўлган. "Барселона"га боргунча у "Пальмейрас" таркибида 11 гол киритишга эришганди.

2009 йилнинг ёзида "Барселона" Кейррисон билан шартнома имзоланганини маълум қилди. Бироқ ўша мавсумнинг ўзидаёқ у "Бенфика"га ижарага бериб юборилди. У ерда 7 учрашувда қатнашиб, 1 гол киритди. Қишки трансферлар ойнаси вақтида эса у "Фиорентина"га йўл олди. Италияда ҳам унинг ишлари юришмади - 12 ўйин, 2 гол.

2014 йилда унинг "Барселона" билан шартномаси якунланди ва у Бразилиянинг "Коритиба" жамоасининг тўлақонли аъзосига айланди.

Миржалол Норматов таржимаси