Баҳриддин Ваҳобов: “Тўпурар бўлиш учун охиригача курашаман”

Навбатдаги икки турдан сўнг тўпурар номи маълум бўлади. Биз эса Ваҳобовнинг бу борадаги фикрлари билан қизиқдик.

- Игорь Сергеев жамоасининг “Машъал”гар қарши ўйинидан кейин голлари сонини 21тага етказиб, бу борада сизга тенглашиб олди...
- Ҳа, кузатиб боряпман.

- Энди қолган икки турда жиддий кураш кечса керак?
- Албатта. Тўпурарликни сақлаб қолиш учун охиригача курашаман ва қараб турмайман.

- Нима деб ўйлайсиз, шахсий ютуққа эга чиқиш учун имкониятингиз қандай?
- Олдиндан бир нарса дейиш қийин. Лекин харакат қилишим аниқ.

- Жамоангизнинг кейинги ўйинларида мабода пенальти қайд этилса, 11 метрлик тўпни ўзингиз тепишингиз ҳам мумкинми?
- (Кулиб) Кўрамиз. Аввал пенальти бўлсинчи. Ўйиндан ҳам уришга бор кучим билан харакат қиламан.

- Жамоадошларингиз ҳам тўпурар бўлишингизни истаб, янада кўмаклашиб юборишни айтаётгандир?
- Ҳа. Жамоадошларимнинг кўмаги бутун мавсум мобайнида катта бўлди. Бунинг учун уларга миннатдорчилик билдираман. Умид қиламанки, қолган ўйинларда ҳам голли паслар оширишади ва бу борада менга ёрдам беради.

- Чемпионат якунида тўпурарликни Сергеев илиб кетса, бу сизга алам қилса керак?
- Албатта. Бутун мавсум мобайнида деярли пешқадамлик қилиб туриб, сўнгги паллада улоқни бой бериш ҳар қандай кишига руҳан ўз таъсирини ўтказмасдан қолмайди. Келинг яхши ният қилайлик ва тўпурарлик пойгасида ғолиб чиқай.

Исломбек Рустамбеков суҳбатлашди.