Азар: "Ишонч ошиши учун "Челси" ҳар бир баҳсда ғалаба қозониши керак"

Ўйиндаги ягона голга Азар муаллифлик қилди.

"Бу гол муҳим эди, чунки бундай баҳсда ғалаба қозониш керак. Биринчи бўлимда ўйинни назорат қилдик, ягона муаммо гол урмаганимиз бўлди. Кўпроқ гол уришимиз мумкин эди, чунки кўплаб вазиятлар яратдик ва биринчи бўлимда битта ёки иккита юз фоизлик имконият бўлди. Ўша вазиятларда гол урганимизда, баҳс осонроқ ўтарди, аммо асосийси ғалабага эришдик.

1:0 ҳисобида олдинда бориб, ўйинни назорат қилиш қийин, аммо ҳимояда ишончли ўйнадик, рақиб кўп зарба беришига имкон бермадик ва ғалабага муносиб эдик.

Бу қуруқ ўйин Тибо Куртуа ўз кучига ишониши учун муҳим эди. Бутун жамоа ғалабага муносиб бўлди.

Ўз кучимизга бўлган ишонч ошишини истаймиз, бунинг учун ҳар бир баҳсда ғалаба қозониш керак. Энди сешанба куни "Рома" билан ўйнаймиз ва ғалаба қозонишга ҳаракат қиламиз" - дейди Азар.