Андрей Микляев: "Бугун кўплаб ёшларнинг ўйинини кузатиб олдик"

- Натижадан кўнглим тўлди. Бугунги ўйинда бир қатор ёш футболчиларнинг ўйинини кузатиш имкониятига эга бўлдик. Тезкор голларимиз ўйин тақдирини ҳал этди. Учрашувнинг қолган қисмида эса баъзи бир режаларимизни синаб кўрдик. Муҳими ғалаба қозондик ва бу нарса "Ал Наср"га қарши учрашув олдидан жамоамизга яхши кайфият тақдим этади. Темурхўжа Абдухолиқовнинг йўқлигига келсак, унда кичик жароҳат бор эди. Шу боис уни муҳим баҳс олдидан асардик. Шунингдек, Кападзе ва Олег Зотеев ҳам бугун ўйнамади ва уларда ҳам микро жароҳат бор. Нега ҳужумчиларни тўлиқ ўйнатмаяпмиз? Чунки олдинда муҳим ўйин бор. Агарда олдинда ОЧЛ доирасидаги учрашуви бўлмаганида, балки Марат Бикмаевга ҳам тўлиқ ўйнашига имкон берардик. Шунда бизда ҳам покер ва хет-трикларни кўрармидик. Ёшлар жамоамиз айни пайтда бизнинг энг оғриқли нуқтамиз. Раҳбарият ҳам бунга жиддий ёндошиб, катта эътибор қаратмоқда. Ўйлайманки, келажакда ёшлар жамоамиз ҳам яхши натижаларни қайд этишади.