Андижон вилоят футбол ассоциацияси “Болалар уйи”да байрам тадбири ташкил этди

Мазкур мажмуа 16 та замонавий уй-жой, футбол стадиони, ёпиқ сузиш ҳавзаси, бокс ва гимнастика заллари, ёзги амфитеатр ҳамда мусиқа залини ўзида мужассамлаштирган. Масканда 95 нафар тарбияланувчи таълим ва тарбия олади.

Халқаро болаларни ҳимоя қилиш куни олдидан Андижон вилоят футбол ассоциацияси муассасада байрамона руҳдаги хайрли тадбир ташкил этди. “Болалар шаҳарчаси”га ўз вақтида “Андижон” клуби ва Ўзбекистон терма жамоасида тўп сурган футболчи Бахтиёр Ҳамидуллаев, фахрий футболчи Раҳим Қодиров ва яна бир қатор миллионлар ўйини фидойилари ташриф буюришди.

“Болалар шаҳарчаси”даги тарбияланувчилардан ташкил топган икки жамоага Бахтиёр Ҳамидуллаев ва Раҳим Қодировлар мураббий сифатида бош бўлиб, майдонга олиб тушишди. Ёш футболчилар ўз мухлисларининг олқишларига сабаб бўладиган даражадаги ўйин кўрсатдилар.

Баҳс якунига етгач, байрам давом этди. Маскан бадиий ҳаваскорлари йиғилганларга қўшиқ ва рақслардан иборат ўз дастурини намойиш қилдилар.

Футбол учрашувида иштирок этган ҳар бир ёш футболчига вилоят футбол ассоциациасининг дипломлари ва турли спорт анжомларидан иборат совғалар топширилди.

“Болаларни футболга бўлган қизиқишини кўриб мазкур масканда ушбу спорт тури бўйича мунтазам иш олиб борувчи тўгарак ташкил қилганмиз”, - дейди вилоят футбол ассоциацияси биринчи вице-президенти Бекзодбек Каримов. – Мазкур тўгаракда таълим муассасасининг ўттиздан зиёд тарбияланувчилари футбол сирларини ўрганмоқда. Умид қиламизки, келажакда улар орасида машҳур футболчилар чиқади”.