“Андижон”: Бугунги машғулотлар ҳақида

Машғулотлар “Бунёдкор” академиясига қарашли сунъий майдонларда ўтмоқда. Эрталаб мураббийлар штаби асосий урғуни футболчиларнинг жисмоний холатига қаратган бўлса, тушликдан сўнгги машғулотда тўп билан ишланди. Жамоа таркибига бугун Ғулом Ўрунов келиб қўшилди. Аввал хабар берганимиздек, ушбу футболчи жорий мавсумни “Андижон”да ўтказадиган бўлди. Ундан ташқари дарвозабон Акмал Турсунбоев ва ҳужумчи Алишер Шоғуломовни ҳам йиғинга келиб қўшилганини айтиш лозим. Турсунбоевни мухлисларимиз яхши билишса керак, 2013 йилги мавсумда “Андижон” дарвозасини қўриқлаганди. У хуқуқий жиҳатдан “Пахтакор” аъзоси ҳисобланади. Алишер Шоғуломов эса охирги пайтларда “Бухоро” йиғинида иштирок этиб келаётганди. Ушбу футболчи илгари Бахтиёр Ашурматов қўли остида “Гулистон”да ўйнаганини эслатиш жоиз. Шу боис мураббий унинг имкониятини яхши билади. Агарда ушбу футболчилар билан клуб ўзаро келишувга эришса, жорий мавсумни "Андижон"да ўтказишади. 

Бунгача “Андижон” йиғинида бўлган ва ўтган мавсум “УзДонгЖу” шарафини ҳимоя қилган Шохруҳ Эргашев, Акбар Ходжаев ва Бекзод Ғозиев жамоа билан хайрлашди. Қолаверса “Қизилқум”дан таклиф этилган Фарруҳ Ҳайдаров ҳам эндиликда ўзига янги жамоа топиши мумкин. Ушбу футболчиларнинг келгуси фаолиятига омад тилаймиз. Селекция ишлари давом этмоқда. Яқин кунларда таркибга яна янги футболчилар келиб қўшилиши мумкин. 

"Андижон" матбуот хизмати.