Аҳмад Абу Исмоил: "Балки Ўзбекистон Иорданиядан қасос олмоқчидир"

“Бу ерга келганимиздан хурсандмиз. Ўзбекистон халқи меҳмондўст эканини биламиз. Бу иккала жамоа ўртасидаги биринчи ўзаро ўйин эмас. Ушбу ўйинга яхши тайёргарлик кўрдик. Ўтган йил Ўзбекистонга қарши тарихий ўйинни ўтказиб пенальтилар сериясида ғалаба қозонгандик. Балки Ўзбекистон ЖЧ плей-оффидаги мағлубият учун қасос олмоқчидир. Ўз навбатида биз ўша ғалаба тасодиф эмаслигини кўрсатмоқчимиз. Эртанги ўйинга тайёрмиз. Таркибимизда бир қатор ёшлар бор”, - дейди бош мураббий.

Аҳмад Абу Исмоил билан бирга матбуот анжуманида Иордания терма жамоасининг асосий посбони Амир Шафи ҳам иштирок этди.

Амир Шафи: Ўзбекистонга қарши ўйинлар доим қизиқ бўлган, эртанги баҳс ҳам бундан мустасно бўлмайди деб ўйлайман. Мухлислар чиройли учрашувнинг гувоҳи бўлишади. Ўзбекистон терма жамоаси яхши савиядаги жамоа, таркибида бир қатор кучли футболчилар бор. Рақибни ҳурмат қиламиз, лекин қўрқмаймиз.

- Таркибда ёшлар кўп деб айтиб ўтдингиз. Улардан нечтаси охирги беш ўйинда иштирок этди?
- Биз Ўзбекистонга асосий таркиб билан келдик. Тўғри ёшлар ҳам бор, улар терма сафида бир неча бор майдонга тушишган. Уларда ҳам тажриба етарли.

- Сиздан олдин Иордания терма жамоасида ишлаган мураббий Хоссам Хассан сизга қандай жамоани қолдирди?
- Мен Иордания терма жамоаси 4 йилдан буён ёрдамчи сифатида ишлаб келганман. Ироқлик мутахассис Аднан Ҳамадга ёрдам бердик. Фақат охирги бир йилда терма жамоада фаолият юртмадим. Мен футболчиларни яхши биламан. Вазифам уларнинг янада яхши натижа қайд этишларини таъминлаш. Ёшлар терма жамоаси билан жаҳон чемпионатида иштирок этганман. Иордания терма жамоаларининг барча тизимида ишлаганим учун футболчилар ва жамоа тўғрисида етарли маълумотга эгаман. Ўша ёшлар термаси сафидан кўпчилик футболчилар ҳозирда етакчи ўйинчиларга айланган.

- Иордания матбуоти Ўзбекистон терма жамоаси ўтган йилга қараганда кучсизроқ деб ёзмоқда. Сиз қандай фикрдасиз?
- Бу жамоанинг натижалари жуда яхши эмасдир, лекин юқори савиядаги футболчиларга эга. Ўзбекистон Осиёнинг энг кучли жамоаларидан биридир. Шу сабабли ўртоқлик ўйинини бу жамоа ўтказишдан хурсандмиз.

- Ўзбекистоннинг Осиё Кубогидаги имкониятини қандай баҳолайсиз?
- Ўйлашимча, гуруҳингизда кураш Саудия Арабистони, Хитой ва Ўзбекистон ўртасида кечади. Хитой охирги пайтларда муваффақиятсиз натижалар қайд этаётгани сабабли ўзини кўрсатишга интилади. Чорак финал масаласи ушбу жамоалар ўртасидаги курашда ҳал бўлади.