Абдусамад Дўрмонов: "Ифтихор"нинг вазифаси ПРО-Лигада совринли ўринларга эга чиқиш"

- Бугунги қўлга киритилган ғалаба билан табриклаймиз.  Бугунги қийин ўтган учрашув ҳақида фикрларингиз...
- Раҳмат табрик учун! Бизда ҳозир қийин тақвим, ҳар тўрт кунда учрашув ўтказяпмиз,  лекин бу футболчиларга жисмоний жиҳатдан қийинчилик берса, руҳий томондан мунтазам футбол ҳавоси билан яшаш уларга қўшимча иштиёқ беради. Футболчиларни ҳар бир ўйинга алоҳида ёндашган холда тайёрлаш керак. Жамоамиз ПРО-Лига дебютанти ҳисобланади, таркибимиз янги йиғилган, жамоа футболчилари бир-бирларини тўлиқ тушуниб олишлари учун бир оз вақт керак. Бизни ютуғимиз жамоамизда тажрибали футболчилар борлиги деб ўйлайман, чунки уларнинг тажрибаси бизга ҳозирги кунда жуда зарур. Биз футболчиларга бошида айтдик, ҳар бир ўйин бугунги ўйин каби қийин бўлади, чунки футболимизга бугунги кунда янгича ёндашув кириб келди, кўриб турибсизлар,  бу йилги чемпионатларимиз кескин курашларга бой бўлмоқда. Бизнинг клубга катта вазифа қўйилган. Ўйинлар ҳар бўлади, лекин биз ҳар бир учрашувга ғалаба учун чиқишимиз керак.          

- Жамоа олдига жиддий вазифалар қўйилганлигини айтиб ўтдингиз, шундай бўлса келажакда мухлислар “Ифтихор” клубидан  яна нималарни кутишлари мумкин?    
- “Ифтихор” - янги жамоа, биласизлар клубимиз Ўзбекистон Ёшлар Иттифоқи васийлигига олинган. Бизнинг вазифамиз ПРО-Лигада совринли ўринларга эга чиқиш, жамоани секин-секин кучайтириб борган холда Суперлигага олиб чиқиш, албатта бунинг учун бир оз вақт зарур бўлади. Биз футболчилармизга доим айтамиз, қанчалик яхши ўйин кўрсатсак, мухлисларимизни ишончига кириб борамиз, бунинг натижасида клубимиз янада ривожланади, асосийси биз кўзлаган мақсадларимизга эришамиз.                

- Кейинги пайтларда “Ифтихор” жамоасини тажрибали футболчилар Мансур Саидов ва Шерзод Ҳакимовлар тарк этганлиги ҳақида хабарлар тарқалди. Шу масалага ойдинлик киритиб ўтсангиз...
- Йўқ, ҳозирча бу номаълум масала. Тўғри, улар ҳозир ростдан ҳам жамоамизда йўқ, улар вақтинча дам олишмоқда. Биз мавсум бошида уларни тажрибаси асқотишини билган ҳолда жамоага таклиф қилгандик, улар бизга ҳали ҳам керак. Лекин аввал улар билан бу борада гаплашиб олишимиз керак, гаплашиб кўрганимиздан кейин масалага ойдинлик киритиш мумкин.

Бекзод Толибов суҳбатлашди