Абдусамад Дўрмонов: "Футболчиларимга характер кўрсатишгани учун раҳмат айтаман"

"Жуда оғир ўйин ўтказдик. Бунинг ўзига яраша сабаблари бор. Ўтган турда Хоразмда суъний қопламали майдонда ўйнаган эдик. Кўп ўйинларимизни Қиргулида ўтказиб келаётгандик, бугун эса "Истиқлол" майдонида тўп тепдик. Футболчида доим иштиёқ ва хоҳиш юқори бўлиши керак. Йигитларга характер кўрсатишгани учун раҳмат айтаман.

Тўғри, ўтган йили ҳам Хоразмга борганимизда суъний майдонда ўйнагандик. Шунга яраша ўзимизнинг суъний майдонда тайёргарлик кўргандик. Хоразмдан якшанба куни қайтдик ва икки кун олдин бугунги ўйинга тайёргарлик олиб бордик. Шу сабабли ҳам футболчилар тикланишга улгуришмади.

Биринчи бўлимда ўйинимиз ўхшамади. Ўйлаб қўйган режаларимиз иш бермади. Танаффусда йигитларга тегишли кўрсатмаларни бердик. Менимча, иккинчи бўлимда футболчилар кўрсатмаларимизни бажаришди. Ҳужумда темп ошди.

Олдиндан нима бўлишини билмаймиз. Жамоамиз олдига доим максимал вазифани қўямиз. Ҳар бир ўйинда ғалаба қозониш ва Суперлигага йўлланма олиш. Ҳар бир ўйинда йигитларга тушунтиришга ҳаракат қилмоқдамиз",- дейди Абдусамад Дўрмонов.