Аббосбек Файзуллаев фаолиятини "Монако"да давом эттириши мумкин

Манбанинг хабарига кўра, "Монако" Аббосбек Файзуллаев трансфери учун 15 миллион евро беришга тайёр, бироқ "армиячилар" қишки трансфер ойнасида сотишни истамаяпти.

Жорий мавсум Аббосбек ЦСКА сафида барча мусобақаларда 22 ўйинда майдонга тушди ва 3 гол уриб, 6 та голли узатма етказиб берди. 

"Transfermarkt" портали 21 ёшли футболчининг трансферини 6 миллион еврога баҳоламоқда. Файзуллаевнинг амалдаги шартномаси 2026 йилнинг ёзигача мўлжалланган.

Франция чемпионати 13-туридан кейин "Монако" 26 очко билан учинчи поғонани банд этиб турибди.