Биласизми? Франция чемпионатида 43 ёшли футболчи ўйнаяпти

Тез орада 40 ёшга тўладиган Златан Ибрагимович кўрсатаётган ўйин даражаси, тўхташ нималигини билмаётган Роналду ва Месси, "Йокогама" билан шартномасини узайтирган 53 ёшли Кацуйоси Миура  ҳақида биласиз.

Бугун Франция чемпионатида тўп тепаётган энг қари футболчи ҳақида маълумот берамиз. Бу — "Монпелье" сардори Виторино Илтон ҳисобланади. У 1977 йилда Бразилия пойтахтида туғилган. "Шапекоэнсе" тарбияланувчиси Европага кўчиб ўтганига 19 йил бўлди. Дастлаб, Швейцария чемпионати, кейин Франция 1-лигасининг "Бастия" ва "Ланс" клубларида тўп тепган Илтон учун 2008 йилда "Марсель" раҳбарияти 5 млн евро тўлади. "Олимпик"даги 3 йиллик фаолиятидан кейин "Монпелье" таркибига эркин агент сифатида бориб қўшилган Виторино ҳамон яшил майдонда жавлон урмоқда. У Франциянинг 2 карра чемпиони ҳисобланади.

Франция чемпионатининг жорий мавсумида 13 та ўйинда майдонга тушиб, умумий 727 дақиқа ҳаракатланган. Бразилиялик марказий ҳимоячининг "Монпелье" билан амалдаги шартномаси 2021 йилнинг 30 июнига қадар амал қилади. Илтон ўтган йилнинг сентябрь ойида Лига 1 да майдонга тушган сўнгги 64 йилдаги энг кекса футболчига айланган эди. Агар томонлар ўртасидаги ҳамкорлик яна 6 ойга узайтирилса, бутун чемпионат тарихидаги рекорд янгиланиши мумкин.

Маълумот учун,  қариялар рўйхатининг 2-поғонасини "Марсель" дарвозабони Йоанн Пеле банд қилиб турибди.