Дилявер Ваниев: "Ғалаба қозонмаганимиз жуда алам қилди"

Унда иштирок этган "Машъал" жамоаси катта мураббийи Дилявер Ваниев қуйидаги фикрларни билдирди.

- Ўйин ҳақида гапиришдан олдин бизга стадион берган "Пахтакор" ва марказлашган чемпионатнинг кейинги ўйинлари бўлиб ўтадиган бошқа стадионлар раҳбариятига миннатдорчилик билдираман. ПФЛ хавфсизлик юзасидан ўйинларни шу ерда ўтказишни лозим топди. Бу қарорни ҳурмат қиламиз. Энди ўйинга келадиган бўлсам, уч очко қўлга кирита олмаганимиз жуда алам қилди. Ташаббус биз томонда бўла туриб юта олмаслик аламли. Мен Виктор Балютовичнинг ўйин услубини яхши биламан ва шунга монанд ҳозирлик кўргандик. "Андижон" асосан стантдарт вазиятлардан фойдаланишга қарор қилди, биз эса учта қулай имкониятни йўққа чиқардик. Камчиликлар устида ишлашда давом этамиз.

- Ҳужумни якунлашда охирги аниқ пас етишмаяпти. Буни қандай изоҳлайсиз?
- Нафақат ўйин охирида, балки учрашувнинг бошқа қисмларида ҳам шундай ҳолат кўзга ташланди. Яқинда ижарадаги икки футболчимиз қайтди. Мен уларга вақт камлик қилди демоқчи эмасман. Фақат вазиятдан фойдаланиш футболчининг ўзида бўлиши керак. Катта болаларга голни қандай уришни ўргатмайсиз-ку. Ҳеч қайси мураббий буни ўргата олмайди. Нима қилиб бўлса ҳам бу муаммони ечишимиз керак. Вазиятлар борлигидан хурсандман, лекин гол бўлмади, шундан хафаман.