"Пахтакор"да ўйнаган португал, исроиллик ва бразилиялик футболчилар ҳозир қаерда?

Дастлаб, грузиялик мутахассис олиб келинди. Шота Юстинович "шерлар" бошқарувидаги илк йилларида кўпроқ легионерларга умид боғлади. У биринчи йилнинг ўзидаёқ ҳужум чизиғини кучайтириш учун 3 та трансферни амалга оширди. 

2017 йилнинг июлида Туркиянинг "Адана Демирспор" жамоасидан олиб келинган Тиаго Безерра келгуси йилнинг охирига қадар "Пахтакор" учун ўйнади. У бу муддат ичида Ўзбекистон биринчилиги баҳсларида 45 ўйин ўтказиб, 21 бор рақиблари дарвозасига йўл топишни уддалади. Бразилиялик футболчи Суперлиганинг 2018 йилги мавсумида 17 гол билан мусобақанинг энг яхши тўпурари ҳам бўлганди. Безерра Ўзбекистондан кейин фаолиятини Қатар чемпионатида давом эттиришга қарор қилди. 34 ёшли ҳужумчи айни пайтда Юлдузлар Лигасида "Ал Сайлия" шарафини ҳимоя қиляпти.

Гиди Канюк ҳам Тиаго билан бир кунда "шерлар" сафига келиб қўшилган. Тошкент клуби унинг трансфери учун 600 минг евро сарфлайди. Бироқ, исроиллик футболчи Безеррадан фарқли равишда Шотанинг ишончига кира билмади. Шу туфайли қишки трансфер ойнасида Тель-Авивнинг "Маккаби" жамоасига ижарага бериб юборилди. 28 ёшли футболчи айни пайтда Таиланд чемпионати вакили "Чонбури" клубида тўп тепмоқда.

Канюк жамоадан кетгач, Шотландиядан Исмаил Гонсалвеш олиб келинди. 400 минг еврога харид қилинган футболчи "Пахтакор" учун 1 йил ўйнаб берди. Португалиялик ҳужумчи 2018 йилги мавсумда "шерлар" либосида 35 ўйинда майдонга тушиб, 18 голга муаллифлик қилди. "Пахтакор"дан кейин бир муддат Теҳроннинг "Истиқлол"ида ўйнаган футболчи охирги мавсумни Ҳиндистон Суперлигасида ўтказди. Исманинг "Ченнай" футбол клуби амалдаги меҳнат шартномаси бугун якун топди. У эртадан бошлаб эркин агент ҳисобланади.

Қуёшли Осиёнинг футболи ғалат (ФР блоги)