Зафар Холмуродовдан бугунги иккита ўйинга башорат

Биз бугун бўлиб ўтадиган иккита ўйин олдидан таниқли собиқ ҳужумчи, фаолиятининг ёрқин дамларини "Насаф" ва "Машъал" клубларида ўтказиб, Қашқадарё фахрига айланган юлдузлардан бири Зафар Холмуродовга юзландик. Холмуродов бугунги ўйинлар борасида ўз фикрини билдирди.

- "Мавсум энди бошланяпти. Кўп жамоаларнинг таркиби кескин ўзгариб кетган, шу боис биринчи турдан олдин аниқ бир нарса дейиш қийин. Шунга қарамай, бугунги иккита учрашувга ўз фикримни билдириб ўтаман".  

"Қизилқум" - "Локомотив" ҳақида:

- "Бугун Навоийда мавсумнинг очилиш ўйини бўлади. Стадионга кўплаб мухлислар келиши кутилмоқда. Бу ўйинда "Локомотив" фаворит, чунки бу жамоа таркиби анча шаклланган, қолаверса, "Локо" чемпионлар лигасида ўз ўйинини кучайтириб олди. "Қизилқум" ҳақида эса бирор гап айтиш қийин. Бир нечта янги футболчилар таркибга қўшилган деб эшитдим. "Қизилқум" бугун дуранг ўйнаши ёки ғалаба қозониши мумкинми? Мумкин албатта, мана яқинда кўрдик, "Эспаньол" ҳам ўз уйида "Реал"ни мағлуб этди. Шундай экан, бу - футбол. Лекин менинг тахминим "Локомотив" 3:1 ҳисобида ғалаба қозонса керак".

"Нефтчи" - "Насаф" ҳақида:

- "Ўйин томонлама "Насаф" кучли, лекин "Нефтчи" майдон эгаси сифатида ўйнайди. Фарғоналиклар ҳам кўплаб янги ўйинчилар билан шартнома тузишди. Аммо янги таркибнинг бирданига яхши ўйнаб кетиши осон бўлмайди. "Насаф"да эса ўйин анча шаклланган. "Насаф" ҳам "Локомотив"га ўхшаб ОЧЛда ўйин амалиётига эга бўлди. Менимча, бугун "Нефтчи" асосан иштиёқ эвазига ўйнайди. Лекин айтиб ўтганимдек, 1-тур олдидан аниқ гап айтиш мушкул. Тахминим эса "Насаф" 2:0 ҳисобида ғалабага эришади".