Забиҳилло Ўринбоев: “Қўлимиздаги имкониятдан фойдалана ололмадик”

Ушбу баҳсдан сўнг “Бунёдкор клуби футболчиси Забихилло Ўринбоев ўз фикрлари билан ўртоқлашди.

-  “Машъал” қарши ўйин биз учун жуда ҳам оғир ўтди, чунки рақибга мағлуб бўлишимиз ҳам мумкин эди. Агарда вазиятлардан тўғри фойдаланганимизда ғалабани илиб кетишимиз ҳеч гап эмас эди. “Машъал” ҳимоявий ўйин кўрсатгани учун ҳам биринчи бўлимда унчалик яхши ҳаракат қилаолмадик. Рақиб дарвозасини ишғол қилиш қийин бўлди. Рақибларимизни ҳимояда таркибли ўйин кўрсатди дея олмайман.

Иккинчи бўлимда кўрсатган ўйинимизни биринчи бўлимда кўрсатканимизда ғалаба қозонардик деб айта оламан. Биринчи бўлимга қараганда иккинчи бўлимда яхшироқ имкониятларга эга бўлдик. Ўйин услуби қанчалик паст бўлса ҳам ҳар бир жамоа ўз уйида жуда ҳам кучли ўйин намойиш этади. “Бунёдкор”га қарши икки, уч баравар куч билан қаршилик кўрсатишади. Балки бошқа жамоага қарши бунчалик ўйин кўрсата олмас.

Агарда ғалаба қозонганимизда “Локомотив” билан очколар орасидаги тафоввут 2 очкога қисқарар эди. Айни дамда “темирйўлчилардан” 5 очко ортда боряпмиз. Қўлимиздаги имкониятдан фойдалана ололмадик. Қолган учрашувларда мағлуб бўлишга ҳаққимиз йўқ. Ҳозирча мураббийлар штабидагилар ушбу ўйин ҳақида ҳеч нима демади. Яна бир ёки икки кундан сўнг “Машъал” билан бўлган учрашувни таҳлил қилиб қаерда хатоликка йўл қўйилган бўлса ўша хатолар устида ишлаймиз ва бартараф этамиз”, - дейди “Бунёдкор” клуби футболчиси Забихилло Ўринбоев.

Жаҳонгир Сотволдиев