"Ёзёвон" футболчилари "Локомотив-БФК" устидан қозонилган ғалабадан сўнг қандай фикрда?

Абдулазиз Жўрабоев: Бугун бизда иштиёқ жуда кучли эди.

- Авваламбор, бугун учрашувни ўтказишимизга рухсат берганлиги учун Ўзбекистон Профессионал футбол лигаси раҳбариятига жамоамиз аъзолари номидан миннатдорчилик билдирамиз. Аввалги учрашувни ўтказа олмаганимиз боис, бугун бизда иштиёқ кучли эди. Шу боис учрашувга жиддий тайёргарлик кўрдик. Насиб қилса, кейинги турда ўз майдонимизда "Лабса" жамоаси билан бўлиб ўтадиган учрашувда жамоамиз мухлисларига яна бир ғалаба тортиқ этмоқчимиз.

Бугунги учрашувда рақиб дарвозасига гол киритиб, жамоамиз ғалабасига ўз ҳиссамни қўшганимдан хурсандман. Насиб қилса қолган ўйинларда бундан кўпроқ гол урмоқчиман.
Куни кеча ПФЛ бош директори Омонжон Ғофуровнинг оталари вафот этганлигини эшитдик, бутун клубимиз номидан марҳумнинг оила аъзоларига ҳамдардлик билдирамиз.

Жасур Отахонов: Барча талаба бўлган ёшларни табриклайман.

- Бугунги ўйинга жиддий тайёргарлик кўрган эдик. Турнир жадвалида пешқадам "Нурафшон" жамоасига яқинлашиб олишимиз учун бизга бугун фақат ғалаба зарур эди. Шу боис учрашув бошиданоқ ҳужумкор футбол намойиш этдик. Мақсадимизга етиб, тезкор гол уриб олганимиздан сўнг бизда қўшимча иштиёқ пайдо бўлди. Бугун бутун жамоамиз яхши ўйнади ва якунда ғалаба қозондик.

Кеча ўзим ҳужжатларимни топширган олийгоҳда имтиҳон натижалари эълон қилинди. Имтиҳон натижаларига кўра талабалик бахтига муяссар бўлдим. Шу боис кайфиятим аъло даражада, бугунги қўлга киритилган ғалаба қўшалоқ тўёна бўлди деб айта оламан. Барча ўқишга кирган ёшларни чин қалбимдан табриклайман. Насиб етса она Ватанимиз учун етук мутахассис бўлиб етишиб, ўзбек футболи ривожига ўз ҳиссамни қўшмоқчиман!

Бекзод Толибов ёзиб олди.