Яшил майдон «актёри»

бу йигитча Оливье Жиру, Энди Кэролл ва Питер Крауч тўп сурадиган лигада шу иқтидорини намойиш эта оладими? Ҳа, бу рақиб жарима майдончасида рўй берадиган ҳаводаги курашлар чоғида фаоллик кўрсатадиганлар учун ҳақиқий краш-тестга айланади. «Вест Хэм» вингери Мичейл Антонио мазкур тестни аъло баҳога топширди. АПЛнинг 2015|2016 йиллар мавсуми бошидан охиригача бош билан тўп киритиш бобида ҳаммани ортда қолдирди - 8та гол.

Ҳозирда кўпчилик Антонионинг бу кўрсаткич билан чекланиб қолмаслиги тарафдори. Нега шундай? Ҳаммаси оддий: Англияда голни Мичейл каби ажойиб тарзда нишонлайдиган бирор футболчини танийсизми? Мана шунақа! Ушбу ярим ҳимоячининг репертуарида макаренадан тортиб, Карлтон рақсигача бор. «Сандерленд» дарвозаси иш­ғол қилинганидан кейин Гомер Симп­сон услубида кўрсатилган шоу эса асосий хитга айланди. Ўшанда Антонионинг нима намойиш этаётганини кўпчилик тушунмади (ҳаттоки, футболчининг ёнига етиб келган шериги Аарон Крессуэлл вазиятни дарҳол англамади), шу боис тушунтириш беришга тўғри келди: «Симпсонлар» мультфильмида Гомернинг шундай қилганини кўргандим. Шахсан мен учун бу жуда қизиқарли кўринди». Кўп ўтмай, футболчи ушбу фикрларга қўшимча қилди: «Менга Барт ёқади. Сочимни худди уникидай қилиб олишим ҳам мумкин. Ишқибозларга яқинроқ бўлиб, бироз ҳазил қилишни хоҳладим. Мавсум охирида мухлислардан энг яхши гол нишонлаш учун овоз беришларини сўрайман». Нима ҳам дердик, бу ҳақиқатан ҳам қизиқ кўринмоқда.

Антонио майдонда намойиш этиладиган аксарият «саҳна кўринишлари»ни олдиндан режалаштиради. Ваҳоланки, айрим ҳолатларда унда иккиланишлар рўй беришини футболчининг ўзи ҳам тан олган: «Тўпни қабул қилиб олишдан бир неча сония аввал уни нима қилиш кераклигини билмайман. Демак, рақиб ҳимоячилари бунданда мураккаброқ вазиятда бўлишади»... Ҳа, бу сўзлар премьер-лиганинг энг ёрқин дриблингчиларидан бири Янник Болази характеристикасини такрорлаётгандек. «Вест Хэм» хавбеки ҳам катта ўйинларга профессионал клублар академияларини чеклаб ўтган ҳолда кириб келганди. Мичейл бу борада кўп ташвишланмайди: «Уларнинг ҳаммаси бир йўналишда машғулот ўтказишган. Ҳозир ҳам бир хил ўйнашади».

Қаҳрамонимизнинг ҳаёти бошқача кечиши ҳам мумкин эди. Антонио 14 ёшида «Тоттенхэм»дан таклиф олганди, аммо оила аъзолари «шпорлар» сафида машғулот ўтказишини хоҳлашмади. Хусусан, онаси ўғлининг ўқишини биринчи ўринга қўйди, қолаверса, уйлари Лондоннинг жанубий-ғарбий қисмида жойлашгани ҳолда фарзандининг пойтахт шимолидан ярим тунда қайтишига йўл қўёлмасди. Йигитчанинг кўз ёшлари фойда бермади - «Мумкин эмас!» деган тақиқ ўз кучида қолди.

Натижада Антонио коллежга кириб, «Тутинг энд Митчам Юнайтед» ҳаваскорлар клубида ўйнади ва ўз навбатида, маҳаллий аквамарказда қутқарувчи бўлиб ишлади. Бир сафар у бир чақалоқни асраб қолганди, аммо ўша касби ўзини қониқтирмаслигини Мичейлнинг гап-сўзларидан англаш қийин эмас: «Даҳшат! У ер жуда иссиқ, бироқ ҳар доим кутиб ўтиришга маҳкумсиз, ахир ҳар қандай вазиятда ёрдамга эҳтиёж туғилиши мумкин. Кимдир сувга шўнғигач, уларнинг нима ўйлаб топишганини англашга уринасиз. Зерикарли. Бассейнга тикилганча вақт санайсиз». Бундай меҳнат тури ойига юз фунт келтирар, шу боис Мичейл оиласидан пул сўрашга мажбур бўларди. Кейинчалик эса жисмоний тарбия ўқитувчиси сифатида фаолият юритди.

«Рединг» клубидагиларнинг Антониога қизиқиб қолишлари келажакка умид уйғотди. Қаҳрамонимиз «Мадейски Стэдиум»да ўтказган 4 йили мобайнида унчалик кўп ўйнамади, чунки асосий вақтини мамлакат бўйлаб саёҳатга сарфлаганди - ижара шартномалари уни Челтнем, Колчестер, Саутгемптон ва Шеффилд томон элтди. Мичейл меҳмонхоналарда яшашга кўникди, мазкур ҳолатнинг нафақат минус (кровать ва кичикроқ шкаф - бор жиҳоз шу), балки плюс (нонушталар) томонларини ҳам топишга уринди. Пардьюнинг «Саутгемптон»и ва «Шеффилд Уэнсдей»да ўтган омадли даврдан сўнг «Ноттингем Форест» билан ажойиб мавсумни ўтказди. Охир-оқибат 2015 йилги трансфер дарчаси очиқлигидан фойдаланган «Вест Хэм» Антониони ўз сафига қўшиб олди.

Шундан сўнг Мичейл йўқолиб қолди. У «Манчестер Сити»га қарши кечган ғалабали ўйинда кўриниш берди, холос. «Хаммерс» «заявка»сидан ўрин олсада, нуқул захира ўриндиғида қолиб кетарди. Баъзан савол туғиларди: бу йигитча қаерда ўзи? Ҳаттоки, «Вест Хэм» раҳбарларидан бири Дэвид Голд ишқибозларнинг Антониони қидирувга бериш борасидаги хабарида «твит» қолдирди.

Вазият куз-қиш арафасида, Билич таркибини жароҳатлар таъқиб этаётган пайтда ўзгарди. Мичейлнинг айтишича, қанот ярим ҳимоясида майдонга тушадиганлар орасида еттинчи ўринда қайд этилган, ўша пайтда эса ундан олдинда турган 6 футболчи жароҳат олишган экан. Шу тариқа, мураббий, ишқибозлар ва Антонио билан қанотда тўқнаш келганларнинг ҳаммаси қаҳрамонимизнинг кучига муносиб баҳо беришди. Бир-иккита ўйиндан сўнг уни асосий таркибдан чиқариб юборишга қодир футболчи топилмай қолди. Кўп ўтмай гол уришни ҳам бошлаб юборди. «Вест Хэм»нинг 30-рақамли ўйинчиси шерикларидан узатмаларни ёғдириб ташлашни талаб қила бошлади.

Антонио учун «Болейн Граунд»даги кескин бурилиш ҳимоя чизиғига ўтганда содир бўлди. Билич қарорини қуйидагича изоҳлади: «Буни режалаштирмагандик, шунчаки, «Ливер-пул»га қарши кечган баҳсда воқеалар ривожи шунга ундади. Антонио мудофаада ажойиб ўйин кўрсатиб, бизни ҳайрон қолдирди ва мазкур ҳолатни муҳокама қилишни жоиз топдик». Хорватиялик мутахассис Мичейлнинг жисмоний имкониятидан унумли фойдаланишни афзал билди.

Тўғри, мазкур ҳолатда Билич бирданига кўпчиликка қарши бораётгандек туюлади. Ҳаттоки, «Вест Хэм»нинг титул ҳомийси Betway ҳам Антонионинг ҳимояда ўйнаётганига қарши норасмий кампанияни қўллаб-қувватлади. Яқинда букмекерлик идораси расмий аккаунтдаги «твит» орқали ушбу тажрибадан воз кечилишига умид боғлади. Бунга сабаб сифатида дастлабки турдан ўрин олган «Челси»га қарши баҳс кўрсатилди. Мазкур ўйинда Антонио «аристократлар» ҳимоячиси Аспиликуэтага қарши фол ишлатиб, пенальти белгиланишига сабабчи бўлганди. Билич кўп ўтмай унинг ўрнига асл ҳимоячи - Байрэмни туширди. Ўша сонияларда Мичейлнинг юз ифодасида бутун дунё ғам-ташвишлари жамлангандек туюлганди. Айтишларича, Антонионинг позицияси жамоа етакчилари ва бош мураббий ўртасида жиддий муҳокамага сабаб бўлган.

Футболчининг ўзи бунга қандай қарайди? Позитивликка урғу қаратмоқда: «Ўйлашимча, бу мени ўйинчи сифатида ижобийлик сари етаклади. Эндиликда ҳимоячиларнинг нимани кутишаётгани, қаерда жойлашишлари ва ҳужумкор футболчилар билан тўқнашишга қандай тайёргарлик кўришларидан хабардорман. Ўйинларимда бундан фойдаланишим мумкин». Ўз навбатида, асл мақсадини ҳам яширмади: «Ўзим учун қадрдон бўлган, бутун умр тўп сурган позициямга қайтишдан умидворман. Ҳимоячи сифатида ўйнашим мумкинлиги ҳатто тушимга ҳам кирмаган. Чемпионшипда энг яхши футболчилардан бири эдим. Энди премьер-лигада ҳам шундай муваффақиятга эришмоқчиман». Ёзги трансфер ойнасининг сўнгги куни ким учундир қувончли келди, ахир «Вест Хэм» Альваро Арбелоа билан шарт­нома тузди-да.

Ўтган мавсум ва мазмунга бой август («Челси»га қарши кечган баҳсдаги муваффақиятсизлик ортидан «Вест Хэм»нинг янги стадионидаги дастлабки гол ҳамда «Сити» дарвозасига йўлланган тўп) Антонионинг Англия термасидан чақирув олишига замин яратди. У Сэм Эллардайс таклиф этган ягона янги ўйинчи бўлиб турибди. Мичейл бундан хабар топгач, дастлаб ишонмади, шунчаки, ҳазилга йўйди. Англия футбол ассоциациясидан келган расмий ҳужжат эса ҳар қандай шубҳаларни йўққа чиқарди.

Яқин-яқингача Антонио рақиблари билан алмаштирган футболкалари коллекцияси билан шуғулланарди. Росс Баркли ёки Серхио Агуэронинг либослари шулар жумласидан. «Уч шерлар» сафида кийган футболкасини эса, катта эҳтимол билан, ўзида олиб қолса керак.

Маълумот учун

Мичейл Грегори Антонио
Туғилган санаси ва манзили: 1990 йил 28 март (26 ёш), Лондон, Англия

Фуқаролиги: Англия, Ямайка
Бўйи: 180 см., Вазни:81 кг.
Позицияси: вингер
Клуби: «Вест Хэм Юнайтед»
Рақами: 30

Фаолияти

Ёшлар жамоалари
2002-2007 - «Тутинг энд Митчам Юнайтед»

Катталар жамоалари
2008—2012 «Рединг» 28 (1)
2009 - «Челтнем Таун» 9 (0)
2009—2010 - «Саутгемптон» 28 (3)
2011 - «Колчестер Юнайтед» 15 (4)
2012 - «Шеффилд Уэнсдей»14 (5)
2012—2014 - «Шеффилд Уэнсдей» 64 (11)
2014—2015 - «Ноттингем Форест» 50 (16)
2015—ҳ.в. - «Вест Хэм Юнайтед» 26 (8)

И.РАҲИМОВ тайёрлади