Япония U-20 терма жамоаси бош мураббийи: "Дастлабки кичик вазифани бажардик"

- Ўйин ҳақида фикрларингиз...

- Илк навбатда, рақиб ҳақида тўхталиб ўтишим лозим, улар бизга бироз ўзгача ёндашди. Биринчи бўлимда тўпни назорат қилдик, иккинчи тайм сўнгида эса ҳисобни сақлаб қолишга интилдик. Гуруҳ босқичидаги дастлабки икки учрашув қийин бўлди, учинчи учрашувда эса эрта гол уриб олдик ва бу бизга эркинроқ ўйнашга имкон берди. Дастлабки кичик вазифани бажардик.

- Гуруҳларда биринчи ўринни олган жамоаларнинг барчаси юз фоизлик натижа қайд этишмади, Ўзбекистон сўнгги учрашувда дуранг ўйнади, Вьетнам эса мағлуб бўлди. Сўнгги учрашувда ҳам ғалаба қозониш учун футболчиларга қандай мотивация бердингиз?

- Мен футболчиларни руҳлантириш керак деб ўйламайман, чунки улар жуда яхши тайёргарлик кўришган ва уларнинг ўзида катта мотивация бор, чунки бу турнир муҳим аҳамиятга эга эканлигини футболчилар мендан кўра яхшироқ билишади. Энди бор эътиборимизни Иорданияга қарши кечадиган баҳсга қаратамиз.

- Биринчи ва иккинчи тур баҳсларида гол ва ассистлар қайд этган Кодаи Сано бугун майдонга тушмади. Санони чорак финал баҳси учун асрадингизми?

- Мен энг яхши таркибни танлаб олдим, бизда иқтидорли ўйинчилар бисёр ва иложи борича барча футболчиларга имкон беришими керак. Кодаи буни тўғри тушунади деб ўйлайман.