Яна Кейруш мавзуси. Энди унга Миср қизиқяпти

Эроннинг tehrantimes.com сайти ёзишича, португалиялик мураббий Миср футбол федерацияси қизиқишлари доирасига тушиб қолган. Ҳатто федерацияси раҳбари Хани Або Рид бу ҳақда журналистларга маълумот беришга улгурган.

Миср терма жамоаси жаҳон чемпионатидаги иштирокини гуруҳ босқичида якунлаганидан сўнг Эктор Купер ўз лавозимини тарк этди. Маълумки, Миср ЖЧ-2018даги ҳамма ўйинларда мағлуб бўлди. Шундан сўнг федерация раҳбари аргентиналик мураббийни ишдан бўшатди.

Эндиликда Миср ўзига янги мураббий изламоқда ва номзодлар орасида энг аввало Карлуш Кейруш тилга олиняпти. Эрон ФФ эса Кейруш тез кунларда янги шартномага қўл қўйишини айтмоқда. Кейрушга қизиқаётганлар орасида ЖАР билан Жазоир ҳам бор. Агар Миср ФФ Кейрушни олиб кела олмаса, унда эътиборни Марокаш термаси устози Херве Ренард ва Австралияни бошқарган Берт ван Марвейкка қаратади.