Хуршид Ғиёсов: “Кейинги йил учинчи ўринни яхшилашга ҳаракат қиламиз”

Албатта, йил бошида Вадим Абрамов шогирдларини ҳеч ким совринли ўринлар учун курашишини кутмаганди. Кеча ўтказилган тақдирлаш маросимида расман жамоа аъзоларига бронза медаллари топширилди. Тантанали тарзда ўтган тадбирдан сўнг, бу йил 12 та гол билан жамоа тўпурари бўлган Хуршид Ғиёсов фикрларини билдириб ўтди.

“Таасуротлар ёмон бўлиши мумкин эмас. Учинчи ўринни қўлга киритдик. Бундан хурсандмиз. Минимум вазифани бажардик. Мақсадимиз гуруҳ босқичига чиқиб, юртимиз шарафини муносиб ҳимоя қилиш. Бу нарсага жиддий қараш керак деб ўйлайман. Биз бу билан тўхтаб қолмоқчи эмасмиз. Кейинги йил учинчи ўринни янада яхшилашга ҳаракат қиламиз. Кимга қанақа билмадим, шахсан ўзим йил бошида биринчилик сари интилишни олдимга мақсад қилиб қўяман. Лекин, бронза ҳам жамоамиз учун ёмон натижа ҳисобланмайди. Футбол жамоатчилигини кириб келаётган янги йил билан табриклаб қоламан. Бутун мавсум давомида биз билан бирга бўлган муҳлисларга раҳмат айтаман.”,- деди Хуршид Ғиёсов.