Хоразмлик Вали Султонов 47 ёшда

У футболчилик  даврида “Жайҳун”, “Қурувчи”(Урганч, 1989-91 йиллар), “Сўғдиёна”(Жиззах, 1992), “Ситора”(Бухоро, 1993), “Турон”(Дошҳовуз, Туркманистон, 1994), “Динамо”, “Хоразм”, “Жайҳун”, “Хоразм-2003”(Урганч, 1994-98, 2000-2004 йиллар), “Хива”(Хива, 1999) жамоаларида тўп сурган. 1992 йили “Сўғдиёна” жамоаси сафида Ўзбекистон миллий чемпионатининг бронза медали соҳиби бўлган.

У мураббийлик фаолиятида фақат Хоразм вилояти жамоаларида фаолият юритди. Жумладан, қатор йиллар олий лигада “Хоразм”(Урганч), биринчи лигада “Ҳазорасп”(Ҳазорасп) жамоаларини бошқарди. Айтиш жоизки, унинг устозлигида  Хоразм вилояти терма жамоаси  “Умид ниҳоллари-2003” спорт мусобақасининг футбол турнирида ғолиб бўлди. “Хоразм” жамоаси  2010 йили Ўзбекистон профессионал футбол лигаси кубогини қўлга киритди. Қолаверса, фаолияти мобайнида кўплаб таниқли футболчиларни вояга етказди. Айни дамда, “Хоразм” фахрийлар жамоасининг етакчи футболчиси ҳисобланади.

Бугунги кунда В. Султонов  Урганч шаҳридаги Спорт ўйинлари ва енгил атлетикага ихтисослашган болалар-ўсмирлар спорт мактабида методист вазифасида самарали меҳнат қилаётир. Бунинг баробарида, БЎСМнинг “Ёшлик” жамоаси  ёш футболчиларини етуклик сари етаклаяпти. Келгусида Вали Султоновнинг  умидлари катта. Бинобарин, Хоразм футболи довруғини янада кўтариш иштиёқида.

11 апрель - Хоразм воҳаси футболи тарихидан ўчмас из қолдирган Вали Султоновнинг туғилган куни. Фурсатдан фойдаланиб, сайтимиз номидан унга сиҳат-саломатлик, бахт саодат ва омад, футболимиз ривожи йўлидаги ишларига барака тилаймиз.

Икром  ХУДОЙБЕРГАНОВ